Ka lehniam Durga Puja yong kiwa ngait niam Hindu ha Jowai dapoi ka chawa kut ynne ka sngi heiwa da pynngam um lut ya ki Blai ha Pohkhyllem iwa man i bynta yong ka wah Myntdu ha Jowai.
Ya ini i pynngam um da wan sakhi da ki spah ngut na kylleiñ ka Jowai kamjooh na East wa West Jaiñtia Hills hei emlang ki bor pulit wa ki bor District.
Kiwa ngait niam chynrang wa kynthai, waheh wa khynnah da chaad ki tymbud luti hei kieh i sur ki bom wa kiwi kiwi nadooh na Shiv Mandir Complex ha Iawmusiang hadooh wa poi ha Pohkhyllem.
Katkam wa pyntip u President ka Sarbajanin Durga Puja Committee (kawa pynman ya kani ka lehniam ha Jowai), u Soumitra Chakravarty da ong u wa i pynngam um ya ki Blai da leh ha ka 3 tarik wei ymtoh ha ka 2 tarik kamwa da leh cha kiwi ki thaw ka ri wa pyrthai.
Da ong u wa da leh yeini neibhah ha ka 2 ar tarik u Naichiphaw khlieh u snem da jooh pynman ya i pynkhooid chnong ha kylleiñ ka Jowai kawa man leh ka sngikha u Mahatma Gandhi wei kam wow burom yeini i pynkhooid chnong da pynngam um ya ki Blai ynne ka 3 tarik.
Discussion about this post