Jowai: Ka yungkrehkaam u Superintendent of Police, WJH deilang waka Jowai Traffic Branch ynne i step da pynman ki ya ka Mini Marathon “Run for Unity” kawa man kam chibynta ka Sardar Jayanti Day kawa sdang heipor 6 waje i step.
Ya kani ka Mini Marathon da wan kaweh lama da u SP ka WJH wei da sdang ko nadooh Laad College wei da lai ko lyngba ka New Hill Point-Challam Syngkong Petrol Pump (Wah Gate)-yingkeiñ Mihmyntdu-ka sarok Bypass warim wei da pynkut ha yungskur ka Jowai Police Public School, Salini Colony.
Ya kani ka Mini Marathon da yabhah ha ki ar bynta ka yong ki chynrang wa yong ki kynthai.
Ha ka kyrdan ki chynrang da yoh nyngkong u Dising Phawa uwa mihkhmat ya ka Kiang Nangbah Government College uwa na Jowai, wa ar da yoh u Marso Kyndait naka North Liberty Higher Secondary School uwa na Sabah Muswang, wa le da yoh u Ribet Dkhar naka skur Government Boys’ Higher Secondary School, Jowai uwa na Sabah Muswang.
Ha ka kyrdan ki kynthai won da yoh nyngkong ka Pynhun Shulet naka skur North Liberty Higher Secondary School, wa ar da yoh ka Phyrnai Kyndait naka skur North Liberty Higher Secondary School, wa le won da yoh ka Happiness Phawa na Seiñ Raij School, Jowai.
Ya kiwa yoh nyngkong da yoh ki ya ka song poisa wa T. 5000, kiwa yoh wa ar T. 4000 wa le T. 3000.
Ha kani ka sngi da e khusnaam leh cha kiwa chimbynta kiwa khian rta dooh kiwa poi nyngkong heiwa da jop u Damang-i-Lyngdoh naka Sabah Muswang Upper Primary SSA School uwa 11 snem i rta wei da yoh u leh ya ka song poisa wa T. 2000 kamjooh da e khusnaam leh cha uwa heh rta dooh wa poi nyngkong u Daia Laloo na Panaliar, Jowai uwa em 38 snem i rta wei da yoh u leh ya ka song poisa wa T. 2000.
Discussion about this post