I dawa wow kyrriah ya ki bru na Them Metor hadooh katni dang man iwa sahteiñ neiwa da mih i awri wa joor ha u snem 2018, wot hadien wa ka sorkar da thung ko ya ka High Level Committee kawa da e kti leh ya ka bui hajrong ini i kaam.
Hawa yaklam wa u muktiar rangbah ka jylla, u VGK Kynta da ong u toh du da ka ujor lyngba ka Diwani næ ‘Civil Suit’ kamwa da phah da ka Meghalaya High Court ha u snem 2019, kawa ye wow pynkut ya ini i eh i khoo waroh wei lada ka sorkar kwah noh ko ya i thaw ha Them Metor, da toh u lai luti katkam ka aiñ.
Da ong u wa ki paidbah toh u tip ki wa chisien wa kwah wow beh noh ya ki, lada ki bru kiwa da tipmit næ chong tooh, datoh u beh katkam ka aiñ wei wow uiñ biang kamwa jooh man nachwa heiwa u Syiem Mylliem da mantre u wei toh u e da ka Notice wow phah mih noh ya ki na itai i thaw wei wot ya ki pata wa e cha ki thaw mane Blai toh u pyndooh pyndam noh ya ki.
U Kynta da ong u wa i wym ye ka sorkar jylla wow khyndang ya kiwa chong wasah tooh ha Them Metor toh neidaw wa kiwa mihkhmat ka jylla ymtoh kiwa chemphang ha ki kaam saiñ hima sima, kiwa tip ya ka riti dustur næ ka rukom mantre ya i khyndaw u Khasi, kiwa tip ya i hiar pateiñ næ ya ki aiñ ki kanun næ kiwa tip ya u pood u ang.
U Kynta da yaroh u leh ya ka seiñ KSU hapoh i yahkhmat Lambok Marngar wa u Donald Thabah kawa da chimkhia hajrong i chah knieh thaw ki Khasi kiwa sah ha Manipur, deiwa yaroh leh ya u Montri Rangbah ka Manipur uwa da phah wow khyndang ya ki bru wa chong tooh ha ki thaw yong ki Khasi.
Da ong u leh wa emkaam wow khut ya u Montri Rangbah ka Manipur, u N Biren Singh wow man kam u Montri Rangbah chi sngi ha Meghalaya wow yada ya ki thaw yong ki Khasi-Jaiñtia.
Puræ leh: Kular u MR ka Manipur wow yada ya ki Khasi wa em ha Tamelong wa Jiribam District
