Dawa ka KSUPBUH na ka PDF wow pynkhlan yei dawa ILP, i tipmit yaka ktien Khasi wei wow pynbiat pood

Shillong: Ka Sur U Paidbah ka Bri U Hynñiewtrep (KSUPBUH) da kyntu ko ya ka seiñ saiñpyrthai People’s Democratic Front (PDF), kawa kyrchaan ya ka sorkar jylla ka Meghalaya Democratic Alliance (MDA), wow chimkhia wow pynsmat hajrong ki le tylli ki phang yaklam wa ka sorkar pyrdi wow pynsmat ya i yaklam wow pynkrehkaam ya ka Inner Line Permit ha ka jylla, u pood u ang wa i pynpsiah ya ka ktien Khasi ha ka 8^th Schedule ka riti synchaar ka ri India.

Hawa klam wa ki laad pathai khubor hadien wa wan yachem wa u Banteidor Lyngdoh, President ka PDF uwa man leh u Montri ha ka sorkar jylla ha yung sah yong oo, u Egenstar Kurkalang da ong u, “I wan i wow kyntu ya ka seiñ saiñpyrthai wow chimkhia u pynkynmoo ya ka sorkar jylla wa ka toh u pynsmat u yaklam wa ka sorkar pyrdi hajrong kini ki le tylli ki phang”.

Da ong u wa i dawa pynpsiah ya i ktien Khasi ha ka 8^th Schedule waka ILP toh iwa da dep mynjur da ka yung dorbar chna aiñ ka jylla Meghalaya. “Lada ka sorkar pyrdi ym kheiñ snep ko ya ki phang dawa wa da mynjur da ka yung dorbar ka jylla, ini mut wa ym em i kheiñ snep ya i sur paidbah ka jylla Meghalaya”, da ong u.

“I ym kwah i wow sñiaw wa ka sorkar jylla u dang ong ko na i daw u COVID-19 ym ye u leh iyi iyi leh “, da ong u. Hawa yatoh wa i eh hajrong u pood u ang, da ong u wa ka sorkar Assam wa ka sorkar Arunachal da pynbait wei e laad wow ya pynbait hapyrdi ki Deputy Commissioner. “Heini leh toh u leh kamjooh “, da ong chooh chooh u.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa kylli ya ki phang dawa pynkrehkaam ILP wei wow tipmit yaka ktien Khasi toh kawa em hei kti ka Ministry of Home Affairs ka sorkar pyrdi wei kammon ka KSUPBUH daw phah ko dei thoh næ ym phah cha ka sorkar pyrdi, da ong u, “I daw pait i yaka luti wow lai kiwa daw chim tangwa i kwah i wa ka sorkar jylla u chimkhia ko wa ki seiñ saiñpyrthai wei ki toh u pynsñiaw ki ya ini cha u Montri Rangbah yow leh smat u ya i kaam “.

Hawa kylli lada u President ka PDF da e kular u iyi iyi ya ini i dawa ka KSUPBUH, u Egenstar Kurkalang da ong u, “U President ka PDF da kular u wow rah ya kini ki phang dawa ka KSUPBUH ha ka yalang kynhun Montri wow yaklam wa u Montri Rangbah u Conrad K Sangma. I yooluti i wa kini ki phang dawa u mankaam smat ki “.