Ka Seng Khasi Kmie (Shillong) da pynsñiaw ko yei sñiawsih wei pyrchah joor hajrong i wym burom deiwa pynemkaam bakla ya i rwai Niam Khasi wa pyrtuid “La Buh Bynta” ha ka sngi Shad Paskha kawa da pynman da ka Nongstoin Archdiocese ha St. Francis De Sales Church wa em ha Parish Um Wahlang ha ka 20 tarik uni u bnai.
Da ong wa katkam ki Video wa da riñ wei da pynpoor bha, da yoo wa da rwai ya ini i sur khlem da yohbor iwa man leh kamwa tooh yei hok kiwa chna ya ini i sur wei ym du itæ, da pynkylla leh ya kyntien wa janai wa kit yumut hadooh wa da man kamwa pynpohdor ya ka Seng Khasi wa ya kiwa ngait skem ha ka Niam Khasi Tynre.
Ya ini i rwai da pynmih paidbah nyngkong da ka Seng Khasi Lyngkyrdem wei kawa em ha ka Kot Jingrwai Seng Khasi (SN: 142, Sla 173).
Ha jrong ini, neiliang u General Secretary ka Seng Khasi Kmie, Shillong, u H. Marbaniang da thoh u cha u Most Rev. Archbishop ka Nongstoin Archdiocese, West Khasi Hills deiwa ong wa ini toh iwa da leh palatpood khlem da pyrkhat wei man ko leh pyrchah ya ka aiñ wei leh khlem akor yei hok mantre yong kiwi kamjooh yei sñiaw yong kiwa ngait Niam Khasi khamtam deiwa pynkylla yei kyntien ini i sur iwa ye wow wanrah yei yachoon hapyrdi kiwa bood Niam Khasi wa kitu kiwa bood ya ka niam thymme wa da wanrah cha kani ka ri-loom wei ym du itæ, deiwa pynkylla ya ini i sur ye ko leh wow wanrah yei sñiawthooh bakla yeiwa ngait ki Khasi.
Hajrong ini waroh da dawa wow paan maap yeini wa pynemkaam yeini i sur kamjooh yei pynkylla yei kyntien ini i sur wei kamjooh toh u paan maap da kiwa yahkhmat ka yaseiñ wa pynman ya kani ka yalang niam wei hap ki leh wow klam deiwa che wym pynemkaam de ki ya ki sur kiwa pynmih wa chna da ka Seng Khasi ha ki por wow wan.
Lada ym paan maap hapoh ka tayaaw nyngkong u Naisan 2025, neiliang ka Seng Khasi daw lai ko katkam ka aiñ yow pynkut ya ini i kaam.
Discussion about this post