Shillong: U Titosstarwell Chyne uwa man leh u MDC ka Sohra da pynsñiaw u yei sñiawkhia yei chah pynhaap boon tylli ki chnong kiwa em ha Proper Sohra ha ka Census Town, deiwa pyntip leh wa da dep u wow thoh cha u Montri Rangbah wa cha ka Deputy Commissioner wow kyntu wa ha i lum thup kawa katni toh u pynlait noh ya kitai ki chnong na ka Census Town.
Katkam i pyntip u MDC, ki chnong wa da chah pynhaap hapoh ka Census Town nadooh ki snem wa nachwa kynthup ki ya ka Khlieh Shnong, Maraikaphon, Saitsohpen, Maw-Ki-Syiem, Pdeng Shnong, Nongrim, Pomsohmen wa ka Kutmadan. Da pynsñiaw u yei sñiawsih yei pynhaap ya kitai ki chnong kam ki Census Town wa da wanrah yei dooh nong ya ki paidbah ha ki kaam pynroi neibhah wa ym chah kynthup ha ki thaw sor (urban) næ palatsor (Rural).
U Titos da pynsñiaw u leh yei lynngoh ha iwon i rukom da pynhaap ya kitai ki chnong hapoh ka Census Town, neibhah katkam ki kyndon, ki chnong wa haap ha ka Census Town toh u em ki ya kiwa chong chnong hadooh 5000 ngut, katwa hei yong sakhiat ym em kiwa chong chnong hadooh kattæ, wei ha kawi ka kyndon leh da klam che wa kamwa 75% kiwa chong chnong ym toh de u man ki kam ki warep, tangwa hei yong sakhiat kiwa boon ki bru ha kitai ki chnong toh kiwa dang chaniah ha ka kaam rep.
U MDC da ong u wa i pynhaap ya kini ki chnong da wanrah ko yei dooh nong kawa khroo ya kiwa chong chnong waroh chi kattu ki snem, neibhah wa ym yoh de ya ki Scheme sorkar wa kynthup leh ya ka MGNREGA, ka PMAY wa kiwi ki Scheme. Da pyntip u leh wa ha ki por wa man u kam u MLA da yasaaid u ya kani ka phang, wei katni daw lum u ya ka yalang wa kyrpang wow pynlait ya kini ki chnong na ka Census Town.
