Ka National People’s Party Farmer’s Front, Jowai Block chirup i yakrehlang ka NPYF, NPP Jowai Block, Women’s Wings Jowai Block deilang ki dkhot NPP yong ka Jowai Constituency, ynne ka sngi da leh burom ki ya ka World Environment Day deiwa pynman i pynkhooid yonglang ya ki thaw paidbah ha i bynta ki sarok soodong ka Thomas Jones Synod College Jowai, neitæ ha i bynta u sarok ka Iawmusiang wei ha kani ka jooh ka sngi da sam ki leh 2000 tylli ki tre dieñ cha ki paidbah kiwa em thaw yow thung ya kini ki dieñ deiwa kyntu leh ya ki u sumar pynheh pynsan ki.
Hadien wa dep pynkhooid yonglang ki ya ki thaw paidbah, da em won ka yalang tbian haphrang Gate ka Thomas Jones Synod College wa pynlai da u Samehi Laloo, heiwa u Jimmy R Kharmuti, State Executive Member NPP Farmer’s Front da e u yei klam yahkhmat heiyatoh wa kani ka Cleaning Drive.
U Egenstar Kurkalang, General Secretary NPP Farmers Front, Meghalaya State Unit uwa da wan emlang ha kani ka sngi, hawa klam yaroh u ya ka sorkar MDA hajrong i kreh chitom yong ka wow e i chakri wa bha ya ki paidbah ka jylla ha ki liang waphær waphær.
Lyngba ini i pynkhooid wa leh ha Jowai yooluti u wa kiwi leh u chimkhia ki dei wow sdang nyngkong yei lehkhooid ha ki yung ki sem ka chnong ka thaw wa kiwi won ki bynta ka imlang sahlang wa em ki.
“Waroh i emkaam u bru ha pyrthai u Blai da e da pyndap pynbiang u lyngba ka rymaw deiwa seiñdur ha jar jiar i bynta, wei yow yoh ya ka um ka la’ær wa khooid leh emkaam u man ka rymaw wa khooid, kamtæ kam ki bru emkaam u sumaar ya ka khnang yow lait na iwon iwon i dooh myntoi wa na i bor kylla ka suiñbneiñ,” da ong u Egenstar Kurkalang.
Neiliang u Octomewot Lamin, Nominated MDC ka JHADC uwa man leh u State Working President In-charge Jaiñtia Hills, hawa klam ong u, ini ymtoh du kat i kaamram ka Party NPP tangwa toh i kaamram yong warohlang neibynta i khooid i pliah, khnang wa waroh iwa da pynkhooid u neh i.
Ong u leh ymtoh iwa suk u pynman ya ka chnong Jowai kawa khooid lym em i yakrehlang na i hi ki bru wa chong wa sahlang wa ka rymaw.
Wei lada hei manbru biang lut nadong chadong leh, tangwa lada noh jhep taroi i, pynsih dur i ya ka rymaw iwa pynyoo wa i maya rymaw man i ha snieh ktien donhi.
Kamtæ lyngba kani sngi da khutlang u ya waroh wow maya rymaw nadooh mynsien ym du hei snieh ktien donhi, wei iwon iwon wa jooh leh pynsih ya ka rymaw u pyndooh pyndam noh dei wow em i kitkhlieh heitæ rukom wa ka rymaw leh u miat u bha ko.
Discussion about this post