Kiwa sikai ha ki skur wa College kiwa yoh yarap poisa (Deficit Grant-in-aid) na ka sorkar jylla da pynman ki yei yakhih pyrchah yei pynbna wei pynkrehkaam ya ka Meghalaya Non-Government Schools and Colleges Employees Centralised Fund Scheme, 2026, heiwa da pynman da ka Poster Campaign.
Kani ka Poster Campaign kiwa sikai da sdang ynne ka sngi ha kylleiñ i District ka jylla.
Kiwa sikai deilang kiwa dang chakri wa kiwa da chong-ngiah leh da rah ki ya ki Placard wa ki Poster ha ki thaw puræ deiwa kyrpaad ya ka sorkar wow burom yei hok kiwa kreh wei wow bood ya ki kyndon aiñ wei yada yei yoh yarap poisa ki ha i por wa chong-ngiah.
Kattu katni ngut kiwa sikai da pynsñiaw ki wa ka yakhih toh wow dawa na ka sorkar yow pynkrehkaam ko da ya ka Scheme wa da wanrah ha u snem 2023, heiwa kiwa sikai Deficit kiwa da chakri wei psiah kaam chwa u 2010 daw yoh yarap ki manda chong-ngiah lyngba ka CPF (Contributory Provident Fund), katwa neibynta kiwa sikai kiwa psiah kaam hadien 2010 u yoh yarap ki katkam ka NPS (National Pension System).
Da pynsñiaw ki leh wa yeiwa da pynmih ha u 2026 ym em yatoh kam wa Draft kawa da mynjurlang ha u snem 2023.
Discussion about this post