Shillong: I joor yong u slap ha kini ki sngi wa da dep da wanrah ko yei chah ktah ya ki spah tylli ki yung ha ki 21 tylli ki chong kiwa em ha ki District waphær waphær yong ka jylla.
Hawa yaklam wa u Montri wa pait yaka chnat Revenue and Disaster Management ka sorkar jylla u Kyrmen Shylla, da pyntip u wa ha kini ki 24 kynta wa da dep da em hadooh 349 tylli ki manyung kiwa da chah tympra, na kini 6 tylli ki yung toh kiwa chah ktah boon, katwa 343 tylli da chah ktah ki malu mala na i chlai um wa ha u slap.
Da pyntip wa ki chnong kiwa da chah ktah da em ki 21 tylli, katwa ki paidbah kiwa da chah ktah na ini i leh ki bor ka rymaw da em ki 1493 ngut, tangwa embhah wa ym em i dooh yei mynsien bru. Da pyntip u wa ka sorkar da booh ko 5 tylli ki Relief Camp wow pynsah chipor ya kiwa chong chnong wa chah ktah.
U Montri da pyntip u wa ki thaw wa chah ktah ha ka æryong wa ha u slap toh kiwa ha Demdema wa Tikrikilla C&RD Block, West Garo Hills District. Katwa kiwa chah ktah ha u phria wa ka æryong toh ha Mawshynrut, Mawthadraishan wa Nongstoin C&RD Block, West Khasi Hills District.
Chooh chooh da pyntip u wa ha Baghmara, Gasaupara, Rongara wa Chokpot, South Garo Hills, ha Zikzak C&RD Block, South West Garo Hills, Bajengdoba, North Garo Hills District da em i chah ktah haka æryong wa u slapbah.
U Kyrmen da ong u wa neiliang ka sorkar da phah ko yaki kynhun yarap cha ki District wa chah ktah wa kynthup ya ki State Disaster Response Force (SDRF) wa ki pulit deilang waki lieñ.
Hawa yatoh wa i chlai um ynne ka sngi ha West Jaiñtia Hills, u Montri da ong u wa ka chnat ym pu em yoh lut ya ki Report napoh ka District, tangwa da pyntip u wa da yoh yutip wa i chlai um ha kani ka District da wanrah ko yei dooh yong iwi i mynsien wei neiliang ka chnat dang yang khubor ko wow pyntikna hajrong ini.
Ha i jooh i por u Montri da pyntip u wa ka chnat da phah ko T.25 lak cha ki Deputy Commissioner yong ki District neibynta wow pynemkaam manda emkaam wow yarap jhan yaki paidbah.
Discussion about this post