Katni ha Meghalaya em ki Politician kiwa pynemkaam ya ki kyntien wa klam u Syiem David wa u Syiem Solomon, kiwa man ki syiem ki ri kiwa jngai kiwa im da ki hajar snem nachwa, tangwa ymtip won ki wow burom pyn ya ki Syiem yong ki hi wa ka dustur riti ki, da ong ka kyrwoh wa phah da u Saiñkupar Nongtraw, General Secretary ka HNLC.
U Saiñkupar da ong u wa ka jaitbru wym tip u burom ya ki syiem yong ki, ya ki dorbar hima, ki dorbar kur, ki dorbar chnong daw wiar i pyrtuid wa i burom yong ki wei lada burom ya ka dustur riti yong i ym em mut wa duna i man kam ki Christan.
Da ong u wa i yong sakhiat hi, ym jooh hoi mynnu mynnu leh wow chaniah ya u Politician næ ka Political Party kawa rieh hadien ka Bible hawa pynsih pynpra, pyndooh pyndam ki yei tre i thied wa ka dustur riti ka jaitbru yong ki hi.
Chooh chooh da ong wa u bru wa maa dooh ymtoh uwa na baar wa wan wow thombor tangwa u bru yong i hi uwa sap ya ka dur bula kam u tre. Manda pynemkaam u Politician ya ki kyntien Khasi wa riti dustur du heipor wa emkaam Vote wa heipor wa em ki Camera wa riñdur ym mut wa maya ya ka dustur ka riti tangwa i chim kabu ya ka dustur ka riti. Thij kam u bru u wym jooh em e um ya u dieñ, u wym jooh yada ya ki thied tangwa uwa nyngkong dooh wow lai khiat soh wei wiar u manda joor u slap ka la’ær.
U Saiñkupar da ong u wa ha kawi ka yalang paidbah, u Ardent Basaiawmoit, President ka VPP, da kynthah u ya ka HNLC neidaw wa pynsñiaw ko yei sñiawkhia heiyatoh wa ka Sanad u Syiem Sohra, heiwa da pynbna paidbah u wa oo to u Khasi wei tip lut ya ka riti dustur.
Kamtæ u Saiñkupar da kylli u na ki bru lada uni u bru toh uwa bood ya ka dustur riti næ uwa kwah donhi ya ka Vote.
Da e nongmuna wa ki khon u Ardent toh kiwa e jait cha u pa tangwa uni u jooh u bru wa batai ya kiwi ya ka dustur riti ki Ynñiawtrep. Wei deiwa leh u kamni da bood u ya ka luti yong kitu kiwa yaleh pyrchah u kiwa na baar neibhah u bru ym ye u wow kylla lym em hi da i mon samen wei ini pynyoo ko yei ar sap.
Da ong u leh wa waroh iwa da thoh ka VPP hapoh ka Manifesto wow yada ya ki Khasi, ka dusur riti tangwa lada pyn da u President ka VPP ym em bood u pynyoo wa ini waroh toh i pynleh pyndur donhi.
Kamtæ da ong u wa ymtoh wow chim kabu ya ka riti dustur neibhah ki bru ymtoh kiwa biej wei hawa ki khon ki hajar ka Hima Sohra deilang ka HNLC yieñ ko yow kyrchaan ya u Syiem Maremdor kam uwa em hok wow ku khet, ka KHADC won ym bien ko u ap u sñiaw yei sur ka Hima neibhah ki kaam Politics man ko kawa rap kor bar yei mon ki paidbah. Wei i pynslem wow e Sanad man ko yow e laad ya uwi won yow yaleh man Syiem wot hadien wa dadep wow pynbna ya uwa manhok wow ku khet.
Discussion about this post