Ynne ka sngi, ki bor District ka West Jaiñtia Hills District hei yahkhmat da u Executive Magistrate, u Wankhraw Kupar Kharbuli, u Deputy Superintendent of Police, u A.J. Sangma, u BDO ka Laskeiñ C&RD Block, u Barister Niang chirup i synraan lang ki pulit da hiar ki cha ka chnong Khatkasla kawa haap hapoh ka Block-I neibynta u phah pyndam yei pynkreh sarok ka sorkar Assam ha kani ka chnong.
Heipor wa ki bor District poi ki ha kani ka chnong da chem ki wa i pynkreh dang lai i chait chait chakhmat deilang ki pooh chiloom kiwa dang tih nala wei pynwandur yow sarok chirup wa ki Truck kit khyndaw.
Kamtæ da phah pyndam phah pynsangeh yei kreh ya uni u sarok wei da phah liwan ya kiwa kreh na kani ka thaw neibhah wa i pynkreh ya uni u sarok wym em man iwa che wei ym yoh yei yutip wa biang.
Hawa yaklam wa uwi u baar jylla wa pait yei pynkreh sarok ynne ka sngi, da khana u wa i pynkreh da lai ko la kamwa le bnai haroh wei uni u sarok toh uwa pynyabi naka chnong Umkhyrmi hadooh Khatkasla uwa em kamwa 10 Km i jrong.
Katwa neiliang u Executive Magistrate won khana u wa da yoh yutip ki dang ha ki kajiak sngi deiwa pyntip ki bru yong kani ka thaaiñ cha u BDO.
Kamtæ ki leh mar ya yoh yutip ki, ha ka 10 tarik uni u bani da hiar nyngkong ki wow lai pait wei da chem leh yei sakhiat wei hawa thooh yutip na kiwa kreh da tip ki wa u Contractor wa pynkreh ya uni u sarok toh uwa napoh ka jylla Meghalaya hi wei manda Phone ki cha uni u Contractor da khana u wa toh ka Central Scheme.
Tangwa neidaw won wym yoh ki yaki kot ki sla wa biang yow sñiawthooh kammon da pynkreh ya uni u sarok, kamtæ ynne ka sngi da hiar ki wut wut yow pynsangeh noh yei pynkreh wei da phah liwan ya kiwa kreh.
