Ka Special Narcotic Drugs and Psychotropic Substances (NDPS) Court ka Bhuj, Gujarat da hukum ko wow kset ya ki 6 ngut ki bru na Pakistan hadooh 20 snem hadien wa khayi tooh ki 77 Kg i Heroin wa chongdor Rs. 384.68 klur ha ki duriaw ka India ha u December 2021.
Ka yung bichaar da booh ko leh ya ka kuna wa Rs. 2 lak samen.
Kini ki 6 ngut kynthup ki ya u Mohammad Imran Mohammad Tariq Vagher (31), u Danis Mohammad Husen Kutchi Vagher (24), u Sagar Mohammad Kutchi Vagher (23), u Ismail Ibrahim Barala (75), u Mohammad Sajid Mohammad Husen Yakublala Kungra (24) wa u Ashfaq Mohammad Ishaq Vagher (26) kiwa na Karachi, Pakistan.
Ya kani ka hukum da pynmih da u Additional District Judge, u VA Buddha.
U muktiar ka sorkar, u HB Jadeja da ong u wa ka yung bichaar da pynmih ko kam kani ka hukum neibhah ini i kaam wa khayi drugs toh iwa boon wei iwa ye u ktah ya ka ri waroh kawi.
Hawa bichaar ya kani ka mukotduma da wanrah 203 tylli ki kot ki sla kam ki sabut wei da em leh 13 ngut kiwa sakhi.
Kam wow kdaw heini, ha u December 2021 ka lieñ na Pakistan ka “Al Husseini” da chah kem ko hajan rood duriaw ka Jakhau ha Kutch kawa da psiah cha ki um ka India kamwa 35 Nautical Mile na u pood hapyrdi ka 18-20 tarik u December wow pympoi yei drugs.
Ki pulit ja Gujarat Anti-Terrorism Squad wa ka Indian Coast Guard da pynman ki yei paitsiar heiwa heipor 2:30 i step ka 20 tarik u December da kem ya kani ka lieñ wa em ki 6 ngut wa 76.936 Kg i Heroin.
Discussion about this post