Kawi ka lieñsuiñ ka Air India kawa mut wow hær na Phuket, Thailand cha New Delhi, India da hap ko wow hiar biang ha Phuket International Airport ynne i step hadien wa kam wa em Bomb hapoh kani ka lieñsuiñ.
Hapoh kani ka lieñsuiñ wa tip kam ka AI 379 da em 156 ngut ki bru kiwa da hap wow hiar biang wei wow sai biang ya ki tiar ki tar ki yow leh yeiwa emkaam.
Hadien wa pait wa kynreh ya kani ka lieñsuiñ ym em chem Bomb tangwa da chem ya kawi ka kot wa em wa thoh wa em Bomb hapoh kani ka lieñsuiñ kawa em wa ieh hapoh paikhana wei dang pynman yei takit ya u bru wa chem ya kani ka kot.
Kani ka lieñsuiñ da mih ko na Phuket Aiport heipor 9:30 i step tangwa da hap skit chwa ko langdong kani ka thaw kawa em ka duriaw Andaman Sea wei hadien wa yoh bor da hiar biang ko ha kani ka Airport.
Kam wow pynkynmoo wa ynnin u snem ki lieñsuiñ hapoh India da yoh Phone yoh Message ki kiwa da jan poi hajar tylli yow pyntieñ wa em Bomb iwa da pynthut yei lai i wan ki bru wei i dooh nong ya kiwa pynlai ya ki lieñsuiñ.
Ini da wan i leh hadien wa ynnin ka sngi da em palat 200 ngut kiwa yap nei haap ka lieñsuiñ ka Air India ha Ahmedabad mar ha hær ko na Airport.
Discussion about this post