U montri rangbah ka jylla, u Conrad K. Sangma ynne da lai u cha South West Khasi Hills District wow chimbynta ha ki kattu katni ki kaam wa da kreh da ka sorkar deiwa sdang u lai ha chnong Mawsde wow wai paidbah ya ki umkor cha ki 25 tylli ki manyung ya kawa da chna hapoh ka Jal Jeevan Mission (JMM) hei emlang u montri ka chnat PHE, u Renikton Lyngdoh wei da yaklam u leh wa ki kattu katni ngut kiwa yoh myntoi.
Da lai yachem u leh ya ki Producers Group (PG) hapoh ka PRIME Meghalaya, ya kawa da pynkrehkaam da ka Meghalaya Basin Management Agency (MBMA) ha yung krehkaam ka DC ha Mawkyrwat. Heini u Conrad da ap u yeiwa pynsñiaw ki paidbah deiwa ong leh wa ka sorkar da yaleh ko wow pynku ya i kaam rep ha ka thaaiñ wa ka jylla.
Da ong u leh wa ka Chief Minister’s Producer Group Support Program (CM-PGS) toh wow pynchlur wow pynboon ya i pynmih mar rep, wow yah kammon wow pynpoi ya ki mar cha yaw. Heini u Conrad da ekti u ya ki Cheque cha ki 15 tylli ki seiñ kiwa da sdang ya ki PG.
Ynne u Conrad da lai pait u leh ya ki yung PMAY wa da chna ha ka chnong Jashiar wei da ekti u leh ya ka poisa yarap (Ex-gratia) kawa T. 50,000 cha ka manyung yong uwa da khlaad na u Covid ha chnong Sakwang heiwa uwa khlaad da ieh u chadien ya 9 ngut ki khon heiwa iwa khian dooh toh iwa dang 15 sngi.
Da yaklam u leh wa ki bor chnong kiwa da yarap wow yakhun ya ka khlam COVID-19 wei da kyntu u leh ya ki paidbah wow wan ki chaphrang wow chim ya i tika.
Ha ka jooh ka sngi da lai pait u leh ya ka CHC ha Mawkyrwat.
