Nga u Esterwis Ryngkhlem uwa man kam uwa chong chnong wa pura ka chnong Madur kamjooh uwa da jooh man kam u Waheh Chnong ka Madur da boon tylli ki snem, kwah O wow pynche hajrong ka khubor wa pynmih da ka Dorbar Chnong Madur hajrong ka Public Hearing wa da pynman da ka Delimitation Committee yong ka JHADC hajrong phiah ya ki MDC Constituency wa da pynman ha ka 9 tarik uni u bnai ha Auditorium ka District Library ha Jowai.
Pynsñiaw O yei sñiawsih cha ki paidbah ka Ri Jaiñtia hi waroh kawi hadien wa yoo khubor O wa kiwa yahkhmat ka chnong ka Madur wa dang duna ki hei pyrkhat pyrdaiñ deiwa pynche ki yei sñiaw yong ki cha khubor donhi.
Ka Public Hearing ym em mut ko du neibynta kiwa pyrchah donhi, mut ko leh ya kiwa kyrchaan haroh tangwa sñiaw diaw kat ka Madur kawa nga da jooh yahluti O heipor wa dadep, dang yoh ko kam kini kiwa yahkhmat chnong kiwa yahbakla ya kiwa chong chnong waroh.
I lai pyrchah yong nga kam uwa chong chnong ha katai ka Public Hearing wa dadep ymtoh du i mon yong nga samen, man i leh ya ki paidbah ka chnong Madur kiwa da jooh chaniah ha nga nadooh ki por wa man O kam u waheh chnong wei hadien hadooh ki por katni.
Kam u bru uwa jooh em ha ka imlang sahlang nadooh ki por wa dang khian i rta hadooh kini ki por katni, man-ki-por da man O ka sur ya kiwa chong chnong wa maya yong nga la hei kmen næ i sñiawsih. Hao kamwa man hawa boon ki chnong, ha chnong Madur leh boon ka ya sooh buit (Political Conspiracy).
Kyrpaad O ya kiwa yalam chnong wym toh u pynhiar dor phi ya ka chnong deiwa phah ki khubor wa mut u pyndooh burom samen donhi.
Kamwa e yumut ya kiwa yahkhmat chnong, phah da ka General Meeting, khut ya kiwa chong chnong waroh hajrong i phiah Constituency, ap ya ka sur uwa chong chnong dep tæ rai.
Ka chnong wa em da ki spah Vote u rai kyrchaan da kitæ ki Executive Committee kiwa katwon ngut donhi mo?
Puræ leh: Pynche ka Dorbar Chnong Madur yei pyrchah u khon ka chnong ya i phiah Constituency
Discussion about this post