Shillong: Uwa yahkhmat ka BJP ha ka jylla uwa man leh u MLA ka South Shillong, u Sanbor Shullai ynne ka sngi da ong u wa ym tip u iyi iyi leh yei rai yong ka Party wow mih noh na ka sorkar Meghalaya Democratic Alliance (MDA) wa yahkhmat da ka NPP.
Da ong u wa hadooh ynne u President ka Party, ym em i yaphyllu yumut lang næ khlem kynjoh ktien lang na oo kam uwa mihkhmat ka Party hajrong i rai wow dam noh u kyrchaan ya ka sorkar, deiwa ong leh wa lada em iwon iwon i baamtooh ha ki ar tylli ki Autonomous District Council kamwa da pynbaad u Ernest Mawrie, toh u yasyllok lang wa kiwa mihkhmat ka Party hachwa wow chim ya kawon kawon ka rai.
Ha i jooh i por da ong wa ka BJP ka yieñ ko ha ka yurim wow pyndooh pyndam yei baamtooh wei nadooh ka Manifesto yong ka Party leh da klam che wa pyrchah ko yaki kaam baamtooh, tangwa lada ka Party chem ko wa em i tkoh næ wym kreh hok ha ka jylla, da toh wow pyntip lang cha kiwa mihkhmat khnang wow pynsñiaw lang ya i tkhoh hakhmat u Montri Rangbah deiwa bichaar bniah lang chwa ya ki sabut.
Da ong wa lada ym pyntip næ kynjoh ktien lang na uwa mihkhmat paidbah, neibhah kamwa da mih, ini i rai wow mih noh na ka sorkar toh kawa da chim hi da u President deilang wa ki kattu katni ki dkhot. Katkam i ong u Sanbor wa kam u MLA ka Party wa waroh kiwa krehkaam ka Party na South Shillong ym jooh tip ki ya ki kaam ka Party kamwa man katni, neibhah ha kini ki kajiak sngi wa wan ka Montri Khynnah ka sorkar pyrdi leh ym em yutip ha i lehkmen yaka sngikha u Montri Rangbahdooh, u Narendra Modi lane wa chah khut ha i lehkmen da ka Party ha kani ka jylla.
Chooh chooh da ong wa kiwa boon ki rai yong ka Party da chim du da u President waki kattu katni, neibhah wot ki Executive Member yong ka Party leh ym tip ki.
