Ki dkhot yong ka Khasi Jaintia Youth Student Union (KJYSU) da pynsñiaw ki heiyatoh wa iwa ong u Dr. WR Kharlukhi uwa da ong daw kmen bha u lada ye ki wow pynkhai im biang yei tih mooyong hapoh Jaiñtia Hills. Heiyatoh wa ini neiliang ka seiñ da kwah ko wow kylli deiwa ong wa ileh ym jooh em klam u hawa dang em u hapoh ka NPP wei heipor wa dang man u kam u MP.
“Ileh wym klam u ha kitu ki por wa dang man u kam u heh ka NPP wei kam u MP tangwa da klam u katni manda mih u napoh ka NPP wei manda man u kam u bru paidbah?” da kylli ka seiñ.
Ka seiñ da kdaw ko wa ini i eh u mooyong ha Jaiñtia Hills da neh i la 12 snem kattu tangwa ka sorkar da e ko du i kular tangwa ha madan ym ye ko u wai.
Chooh chooh ka seiñ da ong ko wa lada ka sorkar ym ye ko u wai noh, kam ka seiñ smat ko wow pynyoo ki buit næ ki luti wei lada ka sorkar Meghalaya ym ye sakhiat ko wow pynlait ya u mooyong toh wow klam che ko cha ki paidbah.
“Ki paidbah ka Jaintia Hills ym kwah ki wow chah khang neibhah wa u mooyong toh u yong ki hi uwa em hok ki kam ki tre. Wei lada ka JHADC leh ym ye ko wow pynbait wei ka sorkar jylla leh ym ye ko, da man i eh wa heh bha,” da ong ka seiñ.
Kamtæ neiliang ka KJYSU da kyntu joor ko ya ka sorkar wa lada ym ye ko wow wai noh ya u mooyong, da toh u khut ya ki seiñ waphær waphær nadooh ki khynroo, ki tre mooyong wa ki dorbar chnong wei kam ka seiñ u ap ko yeiwa da e buit wei daw pynbait ya ki kot ki sla yow thooh ki laad yow wai biang.
“U mooyong ymtoh u mar yong kawon kawon ka Party næ ka sorkar, man u u mar yong ka jatbru yong i”, da ong u D. Shullet, General Secretary wa u C. Phawa, President KJYSU.
Discussion about this post