Ka National People’s Party (NPP) da man ko kawa boon paaid dooh ha ka Yung Dorbar Chna Aiñ wa 60 ngut ka Meghalaya Legislative Assembly hadien wa ku i em MLA ko cha ki 36 ngut deiwa psiah ki 3 ngut na ka United Democratic Party (UDP).
Ya i pdiang ya ki 3 ngut ki MLA da pynman ha P.A. Sangma Building ha Polo Hills, Shillong ynne i jamiet hei emlang u Chief Minister ka jylla uwa man leh u National President ka NPP, u Conrad K. Sangma wa ki Deputy Chief Minister u Prestone Tynsong wa u Sniawbhalang Dhar deilang kiwi de.
Ki MLA warim ka UDP wa psiah cha ka NPP kynthup ki ya u MLA na West Shillong u Paul Lyngdoh, u MLA ka Mawkyrwat u Renikton Lyngdoh Tongkhar katwa u MLA na Mowkaiaw u Nujorki Sungoh da mihkhmat da ki bru yong oo.
Kam wow pynkynmoo wa i psiah NPP ki le ngut da pdiang da u Speaker katkam ka Paragraph 4 ka Tenth Schedule ka Constitution ka ri.
Kamwa man katni ka UDP neh ko sa du uwi donhi u MLA uwa man u President yong ka, u Metbah Lyngdoh.
U Prestone Tynsong hawa e i klam da kyntait u yei piah hapoh ka NPP, katwa u Sniawbhalang Dhar da sñiawskem u wow yoh Majority namo boon MLA dooh ha ka Election 2028.
Neiliang u Paul Lyngdoh da ong u wa kani man ko ka kynti wa nyngkong ka wow sah kynmoo ya oo ha ka saiñ hima katwa u Renikton Lyngdoh Tongkhar da kdaw u ya ki kaam wa jop hapoh ka sorkar Meghalaya Democratic Alliance (MDA).
Discussion about this post