I ku dor smat i dor phñiang kari (Petrol/Diesel) da pynman ko ya ka seiñ kiwa yah kari kamai ha waroh kawi ka jylla wow sangeh kamai khlem booh por nadooh ka 3 tarik uni u bnai neidaw wym yoh nong de i kamai kamjooh wa dang hap kamai sngi pood.
Hawa yaklam wa u Symbood Montri Rangbah ka jylla, u Prestone Tynsong hajrong i chim dan ka sorkar hadooh T.31 na ka chi liter i Petrol, da ong u wa ka sorkar daw bichaar ko hajrong i lum ya i dan na i Petrol wa Diesel wa lada ye wow pynhiar, deiwa pyntip wa ka dan wa lum da ka sorkar toh neibynta wow pyndap poisa ha ka liang puræ puthi, wei ya katni ka sorkar ym pu ye ko wow chim rai yow pynduna ya ka dan.
Da ong u wa i ku i Petrol wa Diesel ym toh du ha ka jylla Meghalaya, tangwa ha ka ri waroh kawi, wei ka sorkar daw phah ko ya ka chnat wa toh u pait yow bichaar bniah hajrong ini wei yow pynbait leh wa ka chnat Transport ka jylla lada em ki laad wow yarap yei ku syndet i dor phñiang kari.
Hawa yatoh wa i dawa kiwa yah kari, u Prestone da pyntip u wa ym ye u kular iyi iyi ya kiwa yalam seiñ kamai kari hajrong i dawa wa da booh ki, tangwa da kular u wa ka sorkar daw chong bichaar chwa ko ya iyi wa ye ko u leh.
