U Erwin K Sutnga, Secretary ka Meghalaya Pradesh Congress Committee (MPCC) da ong u wa ka Party kwah ko wow wanrah yei kylla neibhah wa ka jylla em ko ha i eh wa khroo, da pynbaad u leh wa kani ka sorkar MDA wa katni da chah pynbor bait ko ha ka yung kasari neibynta wow leh ya ki kaam waphær waphær.
Da pynkynmoo u ya ka PIL wa ujor da u L. Shylla, heiwa ka kasari da klam che ko wa i rukom shynchaar hapoh ka jylla toh kawa neibynta ki kattu katni, da ki kattu katni wei yong ki kattu katni.
Chooh chooh da kdaw u ya ki hok manbru wa da chah ktah na ka sorkar NDA ka sorkar India nadooh i kaam mane Blai, heiwa katni ka BJP da kwah ko wow wanrah ya ka Bhagvad Gita ha ki skur, da ong u wa katkam ka Article 25 yong ka riti synchaar ka ri toh wow pynroi pynsah ya i ktien wa i rukom im ki bru tangwa u Amit Shah won da ong u wa ki 8 tylli ki jylla ka thaaiñ mihsngi da pdiang ki wow pynman ya i ktien Hindi kam ka Compulsory Subject hadooh Class-X.
Da beiñ u leh ya ka sorkar MDA hajrong i kular wow pynlait ya u mooyong tangwa hadooh katni da em bait i synchaar i wym hok wa da mih ki High Level kiwa kit mooyong tooh pyrchah ya ka hukum ka NGT. Deiwa kdaw leh yei wan hiar u Chief Justice ha ki bnai wa dadep wei da ujor ki da ka Suo Moto PIL, heiwa da mih ka hukum wei hadooh katni ka sorkar ymye ko wow jubab yeiwa kylli ka kasari.
Neiliang u Erwin da kdaw u leh ya ki kaam ka sorkar MDA wa da ktah ya ki paidbah nadooh ka bhah thung kreh namo ka Reservation Policy, i pynbait ya u pood iwa ympu biang hadooh katni, ki kaam baam-tooh wa kiwi kiwi.
