Jowai: U symbood montri rangbah ka ka jylla, u Prestone Tynsong da ong u wa ym em iwon iwon i maa ya ka sorkar MDA wa yahkhmat da ka NPP hanlada ka seiñ People’s Democratic Front (PDF) rai ko wow dam u kyrchaan ya ka sorkar.
“Hanlada ki soo ngut ki MLA ka PDF dam ki u kyrchaan ya ka sorkar, itæ ym ktah i ya ka sorkar neibhah dang em i hadooh 34 ngut ki MLA,” da ong Prestone hawa yaklam wa kiwa pathai khubor.
Hawa kylli lada ka sorkar daw pyndem ko hakhmat i buit wa pynemkaam da u Chairman ka PDF uwa man kam u CEM ka KHADC, u P.N. Syiem, u Prestone da ong u wa ka sorkar la man katwa man ym dem ko hakhmat iwon iwon i buit.
Da ong u leh wa lada ka PDF dam ko wow kyrchaan ya ka sorkar MDA, ka Congress won u em ko du 24 ngut ki MLA.
“Da ieh i ki i rai yong ki wow chong i ha ki wei lada rai ki wow dam u kyrchaan ya kani ka sorkar leh chong i ha ki hi,” da ong u Prestone.
Chwa ini ka PDF da maham ko wow mih na ka sorkar MDA wa yahkhmat da ka NPP hadien wa soo ngut ki MDC ka NPP rai ki wow dam u kyrchaan ya ka sorkar People’s Democratic Alliance (PDA) ha KHADC.
Soo ngut ki MLA ka PDF wa kynthup ya u Hamlet Dohling, Banteidor Lyngdoh, Jason Sawkmie Mawlong wa u Gavin Miguel Mylliem toh kiwa embynta ha ka sorkar MDA wei ar ngut na kini man ki kam ki montri sorkar.
U Syiem da kam u wa da em i kular ktien hapyrdi ka NPP wa ka PDF wow e ar tylli ki chuki montri wei ki MDC ka NPP u kyrchaan ki ya ka sorkar PDA hapoh KHADC.
“Tangwa soo ngut ki MDC ka NPP da thmu ki wow dam u kyrchaan ya ka PDA wei hajrong ini i leh ym yohsa de i wow dam u kyrchaan ya ka sorkar MDA” da ong u Syiem.
Heiyatoh wa i kam u Syiem wa em i kular, u Tynsong da ong u wa katkam wa kynmoo u, ym em kam katæ ka kular.
“I da yaklam hi-eh i wow chna ya ka sorkar MDA heipor wa chna sorkar, tangwa ym em yaklam i heiyatoh wa ka Executive Committee hapoh ka KHADC,” da ong u Prestone Tynsong.
Da kynmoo u leh wa maham hiar chuki u Syiem kam u CEM ka KHADC lada chna ya ka sorkar MDA wa yahkhmat da ka NPP.
Discussion about this post