Ynne ka sngi kawa man ka sngi wa ar yong ka Dorbar Mang Tangka ka JHADC, hawa e yei klam wow pynsñiaw yei sñiaw hajrong ka ka Mang Tangka, neiliang u MDC ka Congress u Andrew Shullai da sñiaw diaw u wa ka Mang Tangka wa da wanrah man ko du kam ka bui (Report) donhi.
Da ong u wa emkaam wow pyndooh yei lehbor ka sorkar jylla ya ka Council deiwa ong leh wa emkaam wow thooh ki laad wow leh yeiwa emkaam pyn katni wot deiwa e buit wa da toh i por wow pynku ya ka bai NOC wa kiwi kiwi wa chim ka Council.
Heijooh i por da kyntu u ya ka Council wow pyndooh noh ya ki Committe kiwa hapoh ka Council wow pynduna yei lut i sep ka Council.
U Andrew da pynrap u deiwa ong wa emkaam wa ki bru wow chaniah wei wow kyruiñ biang ki cha ka Council.
U MDC ka BJP, u Krison Langstang hawa pynsñiaw yei sñiawkhia hajrong kani ka Mang Tangka ka Council, da ong u wa neidaw wa ym em kiwa bichaar nadooh ki Magistrate wa ki Judge ha ka JHADC da chem chitom bha ki paidbah katni.
Da pynrap u leh wa neidaw wym em kiwa bichaar ha ka Council, katni da pynbor ya ki paidbah wow kyruiñ noh ki cha ka yung krehkaam u Deputy Commissioner wow leh ya ki kot ki sla yong ki, khamtam ya ka Birth Certificate.
Chooh chooh u Krison da dap u dei mynsien wa kmen wa da ye u wanrah ya ki dak thoh Pnar deiwa kyntu leh wa emkaam wow esikai kammon wow thoh wei wow pynemkaam ya ki.
