Ka Russia da chah khang ko wow chimbynta ha ka World Cup 2022 kamjooh leh ya waroh ki liang yong ka da chah khang ki wow chimbynta ha kiwon kiwon ki yakob yaleh bol ha waroh ki ri heiwa yeini da pynbna lang da ka FIFA waka UEFA.
Kiwa yaleh bol ka Russia da toh wow yaleh ki ya ka Qualifying ka World Cup kawa daw pynman ha uni u snem ha Qatar. Katwa ki kynthai won da yoh ki wow psiah yow chimbynta ha ka European Championship ha England kawa daw pynman ha u Naiynñiaw uni u snem.
Ini da khang ko leh hadooh ki Club ki yong ka Russia wow chimbynta ha kiwon kiwon ki lympung yaleh bol wa pynman da ka FIFA lane da ka UEFA.
Ka Russia da toh u yachem ko waka Poland ha ka World Cup Qualifying Playoff Semifinal ha ka 24 tarik uni u bnai wei lada jop ye ko u yachem waka Sweden lane ka Czech Republic ha kani ka 29 tarik yow yoh thaw hapoh ka World Cup. Tangwa waroh kini ki le ri da kyntait ki leh wow yachem waka Russia.
