Ka National People’s Party (NPP) da khwe ko sa ya u MLA warim ka Phulbari, u Abu Taher Mondal uwa man leh u Lamphang (Speaker) warim ka yung dorbar kamjooh u Montri warim ka jylla. Ya u Mondal da pdiang burom cha ka NPP da u National President, u Conrad Kongal Sangma ha i emlang kiwi ki heh ka NPP ha Shillong.
Hawa klam ha ka yalang u Mondal da khana ileh wa jied u ya ka NPP, deiwa ong wa da yakhun u ya ka Election na ka Congress nadooh u snem 1998, wei nachwa da sakhi u ya i wym neh ka sorkar deiwa kynmoo wa ha ki 5 snem, 5 tylli ki sorkar wa mih. Da ong u wa ym jooh em ka sorkar kawa skem hanla em ko ya ki MLA naka jooh ka Party wow synchaar.
Da ong u wa kam ka Liang Pyrchah wot hadien wa da rem u ya ka Election da yang u wow piah kani ka sorkar ha ki kajiak bnai neibhah wa man ko ka sorkar synrop hadooh 7 seiñ, pathan da skem ko hadooh katni hapoh i yahkhmat u Montri Rangbah.
U Mondal da yaroh u ya i kreh ka sorkar Meghalaya Democratic Alliance hapoh i yahkhmat ka NPP, wei da ong u wa waroh ki Block Congress ha Phulbari da poi lut ki cha ka NPP.
Neiliang u Conrad Sangma da ong u wa u Mondal ymtoh uwa dang thymme ha ka saiñpyrthai, tangwa uwa yah ya ka jylla khamtam ha Garo Hills, da ong u wa da i wan u Mondal, ka NPP daw ku chooh ko ha ka jylla khamtam ha ki thaaiñ wa madan ka Garo Hills.
Ha kani ka sngi neiliang u Conrad da pynbna syndon u wa u A.T. Mondal u man u kyrtong ka NPP na Phulbari ha ka Election MLA 2023.
