Uwa e buit namo u Advisor ka Synjuk Ki Khlieh Nongsynshar Hima Sohra, u Paiem Laborious Manik S. Syiem, da kyntait u yei pynbaad u heh ka VPP, u Ardent Miller Basaiawmoit, deiwa pynche wa i yakhih wa pynman ini wa dep man ko neibynta wow dawa Sanad ya u Syiem ka Hima Sohra wei ymtoh ka kaam Politics.
Da ong u wa ka yakhih man ko du neibynta wow yada ya ka dustur riti ka Hima.
Chooh chooh da ong u wa ym kwah ki wow chah taan ha ka Politics mih sarok wei ka yakhih yong ki toh wow yada ya ki 5 tylli ki chrot ka dorbar – ka Dorbar Yung, ka Dorbar Kur, ka Dorbar Chnong, ka Dorbar Raij wa ka Dorbar Hima.
Da ong u wa ha ka yachemlang wa da pynman ha ka 7 tarik uni u bnai ha Dorbar Khlieh Ki Nongsynshar Hima Sohra, da pynman ka yow pyrchah yeiwa chah pyndooh yei hok ha ka KHADC yei rukom jied Syiem Sohra katkam ka dustur riti.
Katkam wa ong u, kiwa pyrchah da lai toor ki cha ka KHADC yow dawa pynbait yeini i kaam wei yow pyrchah leh ya u Ardent uwa da ong wa kani ka yakhih toh kawa leh Politics hawa e u yei klam ha Maw Ki Syiem.
Da beiñ u leh ya uwa yahkhmat ka VPP yeiwa pynkylla dur u ya ki paidbah wa lui-lui kam kiwa kyrchaan ka NPP du neidaw wa kyrchaan ki yei dawa wow tipmit ya u Syiem uwa da jied katkam ka riti dustur deilang ka ñiam ka rukom ka Hima Sohra.
“Me da biah dur mi ya kini ki bru wa hok kam kiwa kyrchaan ka NPP, khlem da yoo da chynna wa iwa pynkhih mynsien ya ki wym toh ka Politics tangwa i maya ki ya ka dustur riti wa da hiar pateiñ nadooh ki warim wajah,” da ong u Paiem Laborious Manik S. Syiem.
Da pynche u leh wa oo ymtoh uwa emyatoh wa ka NPP tangwa i kaamram yong oo toh wow yaleh pyrchah ya kiwon kiwon ki kaam wa chah pyndooh yei hok.
Da kylli u leh ya u Ardent uwa man kam u MLA wa luchia yei kaamram ka KHADC, deiwa ong wa i e Sanad toh i kaam ka KHADC.
Discussion about this post