U Montri Rangbah ka jylla, u Conrad K Sangma da ong u wa ki Bangladeshi wa da wan thombor ha ka thaaiñ South West Khasi Hills toh kiwa man kam ki damok kiwa thmu wow leh ya ki kaam rahbor wei ym em chem ya iwon iwon wa emyatoh ki wa ki bor sorkar Bangladesh.
U Conrad da ong u wa katkam ka takit wa da leh hadooh kattæ da chem wa kini ki bru toh kiwa leh ya ki kaam pynmaa pyntieñ bru wei neiliang ki pulit dang tih bniah chooh chooh ki yow tip deiwa tikna khamtam hadien wa chem ya kawi ka ID u pulit Bangladesh.
Da ong u leh wa ki pulit da kem ki ya boon ngut kiwa emkit hei pyrchang wow rahbor ya uwi u khynroo uwa da chah pynmynsoo leh wei daw pynchitom ya kini ki bru deiwa khor.
Heiyatoh wa i chem ya ka ID u pulit Bangladesh, u Conrad da ong u wa yeini leh ki pulit dang takit bniah ki lada toh sakhiat ka ID u bru wa man kam u pulit ka Bangladesh, tangwa katkam wa chem nei takit wa kini ki bru man ki du ki kam ki bru damok.
Da khana u leh wa da pyntip yeini wa jia cha ka Ministry of Home Affairs ka ri India wa cha ka Intelligence Branch ka sorkar pyrdi. Wei neiliang ka sorkar da pynkhlan ko leh yei sonteri ya ki thaw wa em cha khappood neibynta i chngaaiñ kiwa chong chnong.
U Conrad da ong u wa katkam wa pyntip kiwa chong chnong kani ka thaaiñ wa jia ini, kini ki damok da pyrchang ki wow yut biang cha Bangladesh deiwa psiah chapoh khloo tangwa ym chem luti de ki kammon wow liwan cha Bangladesh.
Kam wow pynkynmoo wa na kiwa da antaad wa em kamwa 8-9 ngut kiwa psiah cha Meghalaya hei step synyaaw ka 8 tarik, da yoh wow kem ya 6 ngut heiwa uwi da khlaad u hadien wa mynsoo nei chah bom chah dat ha ki paidbah.
Discussion about this post