Ha ka yalang pynche paidbah ka Voice of the People Party kawa da pynman ynne ka sngi ha Iawmusiang, Jowai hei emlang nadooh ki MLA yong ka wa kynthup ya u Brightstarwell Marbaniang, u Ardent Miller Basaiawmoit, u CEM ka JHADC u Winston Tony Lyngdoh najrong kiwi won ki MDC ka VPP napoh KHADC wa JHADC, neiliang u Ardent kam u President ka Party hawa klam da pynche u ya ki yurim wa ka Party mih ko wow lai pynsñiaw paidbah ha kylleiñ ki chnong ki thaw kamjooh leh da kdaw u ya ki mat wa ka Party dawa ko naka sorkar jylla.
Hawa sngoh ya ki kaam ka sorkar hapoh i yahkhmat ka MDA, ong u wa boon toh du ki kaam thok chukor wei leh embor ya ki paidbah, wei ki khih ki kreh leh ha kiwa boon ki bynta ym em de yoh bhahlang ki paidbah heiwa da knieh ya ki wei yoh du ki bru wa embynta wa ki hei kaam saiñhima sima.
Ong u wa hawa ap yei ong ki wa ye ki u wanrah Scheme da ki spah klur, hajar klur, tangwa kini ki Scheme waroh pynmyntoi ki du ya ki bru baar jylla ym ya ki para jaitbru ka jylla.
Hawa kdaw u ya ka mat u Lumpongdeng wa ka sorkar mut ko u chna Taj Resort deiwa kam leh wa manda dep chna daw em boon ki khynroo khyllood ka jylla u yoh kreh ki kamwa man ha Vivanta wa ha Marriott Shillong.
Neiliang u Ardent ong u wa hei thooh yutip wa tikna yong oo ha kini ki ar tylli ki 5 Star Hotel thymme ha Shillong wa wanrah da ka sorkar, ym man iwa pynmyntoi kamwa kam ka sorkar, neibhah wa ki khynroo khyllood ka jylla kiwa kreh ha kini ki Hotel yoh ki du ki kam wa khian wa nai katwa ya ki kreh wa rap heh da kreh da ki bru baar jylla.
Da ong u wa ki bru yong i yoh ki du ki kaam wow lum wow pynkooid ya ki soodong, u pynkhooid kamra wei pynkhooid paikhana wei boon na ki toh ki kynthai wei em leh kiwa chah klam poh.
Kamtæ da ong u lada kam kini ki Project ym emkaam i ki hapoh ka jylla hadooh wa kit tre leh kini ki thaw toh kiwa na baar.
Discussion about this post