Dawa ka JNC na ha JHADC wow pynche ya ki daw wa tipmit ya ki kur jaitbru Biate, Hmar, Karbi wa kiwi

Ka Jaiñtia National Council (JNC) Central Executive Committee hapoh i yahkhmat u General Secretary yong ka, u Wanshwa Suting ynne ka sngi da lai ko wow paan pynche na ka Secretary, Executive Committee yong ka JHADC, ka B. Bamon heiytoh wa yoh u yo ya ka Wyrta na ka JHADC wa ka Executive Committee da pynbna ko ya ka thup wa ar wow tipmit ya ki kur kiwa chong chnong ka Ri Jaiñtia, heiwa ka JHADC da pynpsiahlang ko ya ki kur yong kiwi ki jaitbru kam ki Biate, Karbi, Hmar wa kiwi kiwi neidaw wa da man ki kiwa chong chnong wa da slem bha.

Ka seiñ da ong ko wa ini i leh yong ka JHADC ye ko u wanrah yei mih klumar iwa khroo hadien habood yong ka pateiñ ka Ri Jaiñtia.

Kamtæ ka seiñ hawa yaklam wa ka B. Bamon da pynsñiaw ko yei sñiawkhia wei da paan pynche ko na ka JHADC wa kiyi ki yurim kiwa ka JHADC da chim ko neibynta wow pyntikna wa kini ki jait kur kiwa da pynpsiah ko hapoh ka thup yong ki Kur ka Ri Jaiñtia toh kiwa chong chnong sakhiat hapoh u pood u ang yong ka JHADC, khamtam ya ki kur kiwa em hapoh ka “Annexture – II (B) Other Clans Recognised As Indigenous Tribe By Prolonged Settlement”.

Da ong ko wa ini i rukom leh yong ka JHADC wow tipmit ya kini ki kur yong kiwi tawon ki jaitbru ri-loom hapoh ka thup yong ki kur hapoh ka Ri Jaiñtia kawa mantre da ki Pnar wa ki Khasi daw ktah ko ya i hok mantre yong ki tre ri ha waroh ki liang.

Chooh chooh da kylli kiyi ki laad yada wa ka JHADC da pynkhreh ko wow yada ya i hok mantre yong ki tre ri, tre muluk kiwa man u Pnar wa ki Khasi, khamtam heiyatoh wa ka bhah yoh kaam (Reservation Policy).

Ka seiñ da ong ko wa ymye ko u pdiang wa ki Biate, ki Karbi wa kiwi tawon ki jaitbru Ri-loom (Other Tribe) u man ki kam ki tre chnong yong ka Ri Jaiñtia neibhah ka Ri Jaiñtia em ko ya ka parom (History) kawa skem, wei kini ki jaitbru phær ki nadong chadong wa ki Pnar, nadooh ka riti ka dustur, hadooh i riam i bait tynre wa ka ktien thylleij.

Related posts

Ki dak ktien Pnar dang sah ha u Lat wow e yei tipmit: Wailad

May 5, 2026

Poi ki hati khloo chadooh Lawbah wow thooh baam | Tieñ kiwa chong chnong wow lai rep

May 5, 2026

Na itæ i daw kwah ka seiñ yei pynche wa tikna na ka JHADC, kiyi de kitæ ki khon ka Ri Jaiñtia kiwa man sakhiat ki tre ri hapoh i pait yong ka JHADC.

Ka JNC kwah ko wa ka JHADC toh u pynche ko ya ka seiñ yeini waroh da ka chithi hapoh 14 sngi, wei lada ym pynche ka JHADC ka seiñ daw chim ko da kiwi ki laad ki luti wow leh yeiwa emkaam tam.