Uwa yahkhmat ka liang pyrchah, u Dr. Mukul Sangma da pynsñiaw u yei sñiawkhia yei wym ye ka sorkar jylla wow khdoh u khoom yei poor ka khlam COVID-19 hapoh ka jylla.
“I sñiawkhia i yei wym ye ka sorkar wow yaleh pyrchah ya ka khlam. U khñiang katni da poor u chadooh ki thaw palatsor neidaw wym em bood ya ki kyndon,” da ong u Dr. Sangma.
Katkam wa ong u Dr. Mukul, i wym ye wow booh ya iwa emkaam hakhmat da ka sorkar, da e hok ko ya u khñiang wow lai kat chawa kwah u wei da ngat u kat ha kiwa ngait u.
Da pynbaad u leh wa kiwa yoh COVID-19 hapoh ka jylla em ki san chah ya iwa pynyoo ka sorkar.
“Ini toh neidaw wym em lai booddien ya kiwa em hei maa wow yoh ya uni u khñiang,” da ong u Dr. Mukul.
U Dr. Mukul da klam u leh yei artatien ki bru wow chim yei tika deiwa ong wa ini toh neidaw wa ka sorkar ym em e yutip ko deiwa biang hadooh ya kitu kiwa da dep chim tika iwa da pynmih yei sñiawthooh bakla wa hadien wa chim yei tika lada mih i chitom, da pynbaad bait wa toh nei tika.
“Ka sorkar da sñiaw kut laad ko wei da ieh ko ya ini cha ki paidbah wow leh ki,” da pynbaad u Dr. Sangma.
Da ong u leh wa neidaw ka khlam, ki bru wa chitom na kiwi ki jait kjut leh ym yoh de ki yei sumaar.
“I long i man ym toh iwa chngaaiñ wei ka sorkar da toh wow khyrngiat noh ko nei yoh thiah wa i kheiñstiñ,” da ong chooh chooh u Dr. Sangma.
