Jowai: Ka Laskeiñ Block Welfare Organisation (LBWO) ynnin ka sngi da yachem ko ya u montri rangbah ka jylla, u Conrad Sangma ha kamra krehkaam yong oo, ha Secretariat wow dawa pynku kyrdan ya ka Laskeiñ C&RD Block kam ka Civil Sub-division.
Ka LBWO toh kawi na ki seiñ wa da chna nadooh ki snem 2003-04 wow dawa pynku kyrdan ya ka Laskeiñ C&RD Block kam ka Civil Sub-division wei ynnin ka sngi hapoh i yahkhmat u General Secretary yong ka u Nehemayah Tyngkan wa u Vice Chairman yong ka, u Rikut Parein da yachem ki ya u Conrad neibhah ini i kaam.
Ha ka dorkhat ka LBWO da ong ko wa ka Laskeiñ C&RD Block toh kawi na kiwa rim dooh ki Block hapoh ka jylla wa da wai ha ka 10-10-1973 da u (T) Edwinson Bareh dei thmu wow e yarap ya ki paidbah ka thaaiñ.
Ka LBWO da ong ko wa ka Jowai kawa man kam ka nongbah ka District jngai ko kamwa 40 Km na Laskeiñ wei kamwa 70 Km na ki chnong kiwa em cha palat ka Laskeiñ iwa da pynchitom ya ki paidbah hawa kwah ki wow pyndep yei kaam yong ki.
Da ong ko leh wa 80% na kiwa chong chnong toh kiwa rep wei em ko chiboon i duna nadooh ki sarok, i stat i tip, ki kaam rep, ka um-dih wa kiwi kiwi.
Ka seiñ da ong ko leh wa hapoh kani ka Block em du kawi donhi ka Government Secondary School kawa ktah joor ya ki manyung wa dooh neibhah da chah pynbor ki wow phah skur ya ki khon ha ki skur samen kiwa syad.
Da kam ko leh wa em boon i duna hapoh ka Block nadooh ki thaw sumaar, ki yungkrehkaam ki pulit neibhah wa em du ar tylli donhi ki Police Out-Post (Raliang PO wa Saphai PO) wa kiwi kiwi.
Katwa kamtæ ka seiñ sñiaw ko wada toh u pynku kyrdan noh ya ka Block cha ka Civil Sub-Division ya iwa da dawa ko da ki phaw snem kattu.
Hadien ini neiliang u Conrad Sangma da kular u wow chimkhia ya kani ka kaam.
Discussion about this post