U Montri wa pait ya ka chnat puræ puthi ha ka jylla, u Lahkmen Rymbui da kular u ya ka Khasi Jaintia Deficit Schools Teachers Association (KJDSTA) wow pynbiang noh ya ka tulop kiwa sikai man-u-bnai wei yeini i kular u da pyntip u heh ka KJDSTA, u Kular Khongjirem hadien i yachem ka seiñ wa uni u Montri ynne ka sngi.
Neiliang ka KJDSTA da e ko leh ya ka dorkhat wa em ki mat dawa ka seiñ i wow myntoi kiwa sikai.
Chooh chooh u Kular Khongjirem da pyntip u wa katkam wa man katni, kiwa sikai Deficit yoh tulop ki pood bnai iwa da wanrah ya ki hei eh i khoo.
Da pyntip u leh wa neiliang u Lahkmen da kular u wow thooh ki laad ki luti khnang wow ye u su biangpor ya ka tulop cha waroh kiwa sikai.
Iwi won i dawa ka KJDSTA na ka sorkar toh ka bai baam tymmen hadien wa da kut i rta kreh wei ya ini neiliang u Lahkmen ympu em u kular u katwa em leh. Hawa yatoh wa ka Deaths Cum Retirement Benefit neibhah wa katkam wa man kiwa sikai yoh ki du T.3.5 lak katwa kiwa kreh sorkar won T.10 lak.
U Khongjirem da pyntip u wa i dawa ka KJDSTA toh katkam ka 5th Pay Commission, wei i lut ha ka chisnem neibynta ka tulop cha kiwa sikai u kynjoh ko kamwa T.500 klur.