Shillong: Ka sorkar jylla da kyntait ko wow chim ya i kitkhlieh hei wow su ya ka tulop ki wakreh ka Garo Hills Autonomous District Council (GHADC) kiwa khlem yoh tulop kattu la kamwa 30 bnai.
U Symbood Montri Rangbah ka jylla, u Prestone Tynsong da ong u wa ki District Council toh kiwa hapoh ka Sixth Schedule wei ki em ki ka yong ki hi i rukom krehkaam, wei ka sorkar da dep ko wow e ya i bhah wa toh u yoh ki lyngba ki dan cha waroh ki District Council, wei pynrap u leh wa lada dang em ki bhah wa hap e cha ki ADC ka sorkar daw pait ko wow su noh smat katwa ye.
Da ong u wa ym toh i kamram yong ka sorkar wow bah khlieh yei eh wa ki District Council ki yachem ki.
Hawa yatoh wa i wym pu yoh tulop yong kiwa sikai SSA, kiwa da maham wow pynman syndon da ki yakhih, u Prestone da ong u wa i su yaka tulop kiwa sikai SSA ym toh na ka sorkar jylla, tangwa da pyntip u wa neiliang u Montri Rangbah wa u Montri ka chnat puræ puthi da yaklam ki wei da thoh cha ka chnat Human Resource Development (HRD) ka sorkar pyrdi yow pynlait noh smat ya ka tulop kiwa sikai.
