Kynthah u President ka VPP ya u MLA ka Nartiang wa Jowai

Ha ka yalang pynche paidbah ka Voice of the People Party (VPP) wa da pynman ynne ka sngi ha Iawmusiang, Jowai, u President ka VPP, u Ardent Miller Basaiawmoit da kynthah u ya Deputy CM ka sorkar uwa man u MLA ka Nartiang wa kamjooh leh ya u MLA ka Jowai heiyatoh wa i ong ki wa i pynman yakhih ka VPP toh i leh Politics ko.

Neiliang u Ardent ong u i pynbaad leh Politics ka VPP yow yoh Vote deiwa pynkhih paidbah hawa yoh laad, toh i klam wym sñiawthooh kini ki MLA iyi mut Politics, wei kopsar ka Politics yong kini ki MLA toh du ka Election wei chong ha Secretariat donhi.

“Ha ka VPP hi sñiawthooh ko iyi mut Politics wei itæ toh hajrong kammon wa da chim ko ya ki rai wa boon ha ka ri yong i, kiyi wa pynman u chim ya ka rai ka bor, wei ya kani ka bor wa da saiñdur toh u pynemkaam neibynta ka roi ka paar, i chong suk chong saaiñ wei i ku i yoh i laa,” da ong u Ardent.

Wei ong u leh ym em jied ya u MLA ka Jowai, u MLA ka Nartiang wow lai pynku ki ya ka spah yong ki hi, tangwa yow chakri u yada ya ki paidbah ym u knieh khih na ki paidbah.

Neitæ pynche u wa i pyrchah ka VPP yeiwa leh ka sorkar, toh wa yoo ko ymtoh i thmu u pynku ya ki bru ka jylla tangwa yow e khih heh ya kiwa na baar.

Da pynrap haroh u deiwa ong wa ka VPP ym em sñiawsuk ko u kynthoh u kdaw kti tangwa yow sikai yow pynche donhi ya ki paidbah, wei la jia hajrong wa pynche ki paidbah dang jied bait ki ya ka NPP ym ye i u leh iyi iyi.

“10 snem nachwa kat wym pu mih ka VPP, ki heh spah da leh heh bait ki heiwa ym em por ki u yachem paidbah neibhah ong ki wa manda poi por Election u thied kamwa thied saphlang, thied myrdoh. Wei 15 snem nachwa u MLA ka Nartiang ym jooh rap yoo wa lai e Work Order u, katni won da jan man ka tayaaw neidaw wa tieñ Prah u. Ini pynyoo wa ki paidbah da stat u neiwa sikai ka VPP,” da ong u Ardent.

Related posts

Ha u 2028 u jop ka VPP 32 na ki 36

May 5, 2026

Ki dak ktien Pnar dang sah ha u Lat wow e yei tipmit: Wailad

May 5, 2026

“Sikai i ya ki paidbah yow tip ki yei hok, yow tip yei kaamram kam ki MLA wa MDC wei itæ da man i e wa khroo ka VPP cha ki paidbah”.

Ong haroh u wa kiwi ki Party ym em kwah ki u pynman yalang ka VPP ha ki yaaw ki haat neibhah wa sñiawthooh ki wa daw yoh sikai ki paidbah wei daw tip lut ki waroh ki Scheme.