Jowai : Ka mukotduma wa bichaar da ka Supreme Court hei yatoh wa i khrong dan ki Dolloi ka ri-loom Jaiñtia da chong bichaar biang ya ka ha ka 5 tarik uni u bnai hadien wa ka JHADC leh da pdiang ka yung bichaar yow embynta ko ha kani ka mukotduma.
Ka JHADC da ong ko wa ini i khrong dan ki Dolloi toh iwa ym em lai ki katkam ki hukum ka yung bichaar kamtæ da kyrpad ki ya ka yung bichaar yow phah pyndam yei khrong dan ki Dolloi.
U muktiar ka JHADC leh da pynsniaw u yeiwa boon ki kaam wa da leh da ki Dolloi kamjooh leh ya ka chithi wa phah ki cha kiwa kreh ka JHADC wa ong wa pynthut (Contempt of Court) ki yei pynkrehkaam ki Dolloi ya ka hukum ka Supreme Court.
Da ong u leh wa ini i rukom khrong dan ki Dolloi ym em man ko katkam ka riti dustur wei da pyrchah u yei kaam u muktiar ki Dolloi wa leh ki katkam ka riti dustur.
Katwa neiliang u Honorable Justice Pinaki Ghosh wa u Justice R.F. Nariman wa chong bichaar ya kani ka mukotduma ym em pdiang yei dawa ka JHADC yow pynmih hukum thymme wow phah pyndam ya ki Dolloi yow khrong dan ki.
Da phah ki leh ya ki Dolloi wow jubab ki yei kynnoh ka JHADC wa ym em lai ki katkaam ka dustur riti.
Neiliang ki Dolloi daw lai ki cha khmat heiwa daw kylli ki ha khmat ka yung bichaar wa ka aiñ The Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Chnong) Act wa ka JHADC wa pynmih ha u snem 2015 wa hadooh katwon man sakhiat ko ka aiñ wa pura.
Da kam ki wa ka Constitution ka ri India e bor ko ya ka JHADC yow jied ya ki waheh chnong wa ki Dolloi yow krehkaam ki neibynta ki paidbah tangwa ym em e bor ko ya ki wow luchia ki ha ki kaam niam.
Also Read: Ye phi u Download ya ka aiñ synchaar Elaka synchaar chnong ka JHADC heini
Discussion about this post