I pyndik ki Karbi ya ki Pnar ha Lapangap, West Jaiñtia Hills iwa da sdang nadooh ka 10 tarik uni u bnai da pteiñ i hadooh kini ki sngi heiwa ki warep na ka chnong Lapangap da dooh ki wow hiar cha ki hali wow pait wow sumaar ya u kba wa da thung ki neibhah wa chah beh ki ha ki pulit Assam wei chah siat watur ki ha ki Karbi kiwa rieh ha ki khloo wa em hajan ki hali.
Heiyatoh wa ini da yoh wow yaklam wa uwi u warep na Lapangap, u Alam Sumer u wym pu yoh u lai cha i hali yong oo wa em ha i thaw wa thombor ki Karbi.
U Alam da ong u wa nadooh uni u bnai da thut bha i lai pait um pait kba u ya ka hali neibhah hawa lai cha hali da chah beh ha ki Karbi wei lada lai cha loom won da chah beh ha ki pulit Assam.
Da kyrpaad u ya ka sorkar wow chimkhia yeini khnang wow lait nei eh i khor yow lait ki u man kam ki khonswet khonrangli.
Chooh chooh da pynrap u deiwa ong wa kam ki warep lada ymyoh ki wow pait um ha ki hali wow sumaar ya u kba daw man i doohnong wa khroo ya ki.
U Alam da ong u leh wa da hiar u chajan hali khnang wow paitsiar boi duna ki Karbi khnang wow ye u wow sumaar ya u kba.
Heijooh i por da ong u wa ini toh i por ya ki kam ki warep wow lai wai um wei wow e dawai wei i daw wym yoh u leh yeini toh wa pynwit ki Karbi ya ki.
Da ong u leh wa ymtoh du oo samen tangwa waroh ki warep wa ki khynnah lai pait ki cha hali neibhah heipor wa dadep ymjooh jia kamni.
Discussion about this post