Jowai: Ka North East India Mission Association (NEIMA) Orphanage Home Sahsniang Unit ynnin ka sngi da e dorkhat ko ha u montri rangbah ka jylla lyngba u montri ka chnat Fisheries ka jylla, u Comingone Ymbon.
Ha ka dorkhat ka NEIMA da paan yarap ko na ka sorkar khnang wow ye ko u pyndap yeiwa duna ha kani ka thaw ri khonswet.
Heipor wa e ya ka dorkhat da emlang leh u MLA ka thaaiñ, u Nujorki Sungoh, u MLA ka Jowai, u Wailadmiki Shylla u CEM ka JHADC, u Thombor Shiwat wa ki MDC ka Council.
Ya kani ka NEIMA Orphanage Home, Sahsniang da sdang ha u snem 2003 hadien wa mih i awri pood hapyrdi ka Assam wa ka Meghalaya heiwa da haap yut chnong kiwa na Block-I cha Sahsniang heiwa da boon ngut ki khonswet katwa kamtæ da sdang noh ya kani ka thaw ri ya ki.
Ya u mooyurim yong ka NEIMA Orphanage Home da wan wai da u montri rangbah warim ka jylla, u Dr. DD Lapang ha ka 17 Thohlakhmi 2004.
Katkam wa man katni em 22 ngut ki khynnah ha kani ka thaw wa kynthup ya 10 ngut ki chynrang wa 12 ngut ki kynthai katwa kiwi da mih noh ki na kani ka thaw hadien wa dap ki 18 snem. Na ki khynnah wa da ri ka NEIMA 15 ngut toh kiwa da pyndep SSLC wei 2 ngut won ya ka HSSLC.
Kani ka thaw man ko kawa em chiboon i emkaam neibhah boonsien yoh yarap ki du na ki bru samen donhi wa ki seiñ wei em ki por man i iwa eh wow pyndap yeiwa emkaam ki khynnah khamtam ya ka tulop cha ki wakreh.
Da pyntip leh cha ka sorkar wa emkaam hadooh T. 12,92,700 chi snem yow pynlai ya kani ka thaw ri khonswet wei da paan yarap wow kyrchaan ka sorkar ya ka.
Discussion about this post