Ka Khynroo Khyllood Committee Seiñraij Jowai ha uni u snem da kynjooh i lai luti yong ka cha u moomær wa 35 tylli ki snem, kamtæ kam chibynta wow leh burom yei man kyrpang yong uni u snem, ka Khynroo Khyllood Committee da pynman ko ka tayaaw lehkmen lehburom wa tip kam ka Quintricennial Celebration kawa da sdang nadooh ka 24 tarik uni u bnai wei da pynkut won ha ka 27 tarik.
Ha ka sngi pynkut yong kani KKC Seiñraij Quintricennial Celebration wa man ha Yungwalieh ka Loompyrdi Iongpiah da wan wow sakhilang da u Wailadmiki Shylla, MLA ka Jowai kam u kongsan hei emlang u Pa Dolloi ka Elaka Jowai, u Waheh Puramon Kynjing, u President ka Seiñraij Jowai, u O.H.Toi, u General Secretary ka Seiñraij Jowai, u Arwotki Sumer wa kiwi ki waheh wasian wa ki manbei manpa.
Ha ka yalang wa da pynlai da ka Wandalanki Dkhar, Chairperson KKC da yoh i ngoohblai da u Chanphi O Niangti, Member KKC, i khana pynsñiaw ya ka Report kyllum ka Committee da u Sajonksiar Langdoh, Secretary KKC, i klam i khana yei parom i lai luti ka Khynroo Khyllood Committee da e da u Valentideo Paswet, Sangot Paswet kam uwi na ki dkhot warim katwa hei pynkut wan ka Manhaka Shylla, Asst. Secretary KKC wow e ki kyntien khublei.
U O.H. Toi hawa klam ha kani ka sngi da ong u hawa chim u leh burom ya kani ka sngi toh u pait i yei wa chadien wei wa chaphrang yong ki 35 tylli ki snem. Ong u leh lada pait i ha kiwon kiwon ki bynta ki khynroo khyllood toh em ki ka bor wa khlan wa ye u pynman kaam yeiwon yeiwon iwa mut wa mang ki wei da yaroh u leh ya ki khon khynroo khyllood ka Seiñraij kiwa da ye sakhiat u leh chiboon ki kaam wa miat wa bha hapoh ka imlang sahlang yong ka Seiñraij.
Neiliang u Arwotki Sumer hei e kyntien ha kani ka yalang, dap u dei sñiawngooh wa khroo ya ki khynroo khyllood ka Seiñraij kiwa da chahtre sakhiat ya ka seiñ ha kiwon kiwon ki kaam wei chooh chooh da e mynsien u leh ya ki khon khynroo khyllood wow man kiwa yatylli wei yatoh yumut.
Iwa kyrpang chooh leh ha kani ka sngi toh i klam i kappæ na u Wailadmiki Shylla uwa da ong wa katni ki sngi yoo sakhiat wa ha kiwon kiwon ki bynta khlem ki khynroo khyllood ym ye u man, kamtæ kyrsu kyntu u ya ka Khynroo Khyllood Committee wow chim ko leh ki laad ki luti u pynman ki kynja Awareness Programme neibynta ki khon khynroo khyllood wei lada ka KKC bien ko u le yeini neiliang yong oo man u uwa hakhmat wow yakrehlang wei kyrpang chooh leh heiyatoh wa i pynneh pynsah ya ka rukom dustur næ i tip u pynemkaam ya ki tiar put tiar tem yong i dahi toh iwa emkaam bha wow pynchlur ya ki khon khynroo wow man kiwa tip khnang yow im u neh u sah ka niam ka rukom dustur, riti yong i.
Ha kani ka sngi najrong i klami kappæ da em leh i saam ya ki Prize cha kiwa jop yong ki yakob waphær kiwa kynthup ya ka Recitation, ka Quiz, Debate & Extempore Speech wei da pynchongchit leh ya kani ka sngi da ki chaad ki rwai wa da chimbynta da ki khon khynroo khyllood na ki dong ki chnat waphær kiwa em hapoh ki thawaner ka Seiñraij Jowai.
Discussion about this post