Ka seiñ Khasi Students’ Union ha i lai pynche paidbah yong ka ya 5 tylli ki mat dawa na ka sorkar jylla yow pynmankaam ko hapoh 15 sngi, deiwa sdang ynnin ka sngi na Mawkyrwat, South West Khasi Hills, ynne ka sngi won da hiar pynche ko ha Khliehriat, East Jaiñtia Hills District ha ka yalang wa da pynman ko hakhmat u mot Kiang Nangbah hajan pchem ka yung krehkaam u DC ka East Jaiñtia Hills District, heiwa da wan emlang leh nadooh kiwa yahkhmat ka KSU Central Executive Council wa kynthup ya u President, u Raymond Kharjana, u General Secretary u Ruben Najiar, ki dkhot ka KSU napoh West wa East Jaiñtia Hills.
Ki mat dawa ka seiñ kynthup wow pyndam noh chisiendon ya ka Public Hearing ka Shree Cement kawa da pynman ha ka 31-07-2026 wei wow Suspend ya u DC wa SP ka East Jaiñtia Hills kamjooh leh ki sahep ka MSPCB, neibhah ong ki wa ha katai ka Public Hearing kiwa pyrchah ym em yohlaad ki u lai chimbynta yow pynsñiaw ya ka sur yong ki neidaw wa chah khang luti wei chah thombor ha ki bor pulit wa kiwa kyrchaan ya ka Shree Cement, wei dapoi leh chadooh u pood i mynsoo bru wei chah pynsih ki kari.
Neitæ ka mat hajrong wow pynkrehkaam noh ya ka Meghalaya Residents Safety & Security Act (MRSSA) 2016, wow pynkrehkaam yei pynkylla (Amendment) ya ka Meghalaya Identification, Registration (Safety & Security) of Migrants Workers Act 2020, u pynbait yei eh hei rukom thung kreh ha NEIGRIMHS katkam ki kular, u pynman yei rukom thung kreh wa che wa khooid dei wow pyndooh noh ya ka Personal Interview ha ki jait kreh Grade ‘C’ wa Grade ‘D’, u wanrah i kylla ha ka MPSC, DSC kamwa e yumut ka seiñ dei wow chna ya ka Standard Operating Procedure neibynta waroh ki Recruitment Board.
Wei hajrong kini ki mat dawa ka KSU da wan ko wow e kyrchaan leh da kiwa yahkhmat seiñbhalang na kiwi won ki seiñ, kam ka Hima Sutnga Youth Federation, kiwa chong chnong ka Shnongrim, Daistong wa kiwi.
Napyrdi kiwa e klam ha kani ka sngi, ki mat wa rap ban joor ki toh hajrong ka Public Hearing ka Shree Cement kawa dadep pynman ha Lum Syrman, Elaka Nongkhlieh, East Jaiñtia Hills District, heiwa kiwa klam napoh ka Hima Sutnga Youth Federation, kiwa chong chnong ka Shnongrim wa Daistong da khana ki yei chah ktah yong ki lyngba i wan ka Shree Cement wei da pynkynmoo haroh ki yeiwa da jia ha luti heipor wa mut ki u lai cha ka Public Hearing yow pynsñiaw yei pyrchah.
Neiliang ka KSU lyngba u President wa General Secretary ka Central Executive Council hawa klam hajrong kini ki mat dawa, ong ki wa la kammon kammon leh ka seiñ ym pyndem ko lada ka sorkar ym pynmankaam ko ya waroh 5 tylli ki mat, wei ka sorkar hap maad ko leh yei yakhih yong ka seiñ ha ki rukom waphær waphær.
Ong haroh ki kamwa napyrdi ki 20 tylli ki mat wa ka seiñ da phah ko cha ka sorkar hadien wa dep pynskem ya ki dkhot wa thymme ka CEC, kattæ jied ki wow pynmankaam smat chwa ya 5 tylli ki mat neibhah sñiawthooh ki wa kini man kiwa rap suk ya ka sorkar u leh lada em i mon ko.
Ha kani ka sngi neiliang ka President yong ka Meghalaya Indigenous Women’s Council, ka Bythygrace Dkhar hawa wan e kyrchaan ya kani ka mat dawa ka KSU, da pynsñiaw haroh ko yei chem yong ka ha ka sngi pynman Public Hearing ka Shree Cement, deiwa ong wa ha katai ka sngi ki paidbah da maad ki yei jynjar saja nei chah thombor ha ki bor pulit wa kiwa kyrchaan ya ka Public Hearing, wei wot kiwa kjut chitom leh chem saja bha ki u lai cha ki thaw e sumaar neibhah wa da tih da khloh ya u sarok ha pyrdi wot.
Discussion about this post