Ka Meghalaya da pynkhreh ko wow pynjoor i yakhun pyrchah ya ka HIV wa ki kjut STD deiwa sdang ya ka Intensified IEC Campaign 3.0 ynne ka sngi chirup i lehwarom ya ka International Youth Day ha Lady Keane College heiwa u Health and Family Welfare Minister, u Wailadmiki Shylla da man u kam u kongsan.
Katkam ka yukheiñ ka Meghalaya AIDS Control Society ha u November 2025 da em palat 10,000 ngut ki bru wa da heh wa 500 ngut ki khynnah wa em HIV/AIDS ha jylla heiwa ka East Jaiñtia Hills toh kawa boon dooh wa em ya uni u khñiang kjut.
Ka India HIV Estimation 2025, da ong ko wa ka Meghalaya em ko boon dooh ki bru waheh wa em HIV iwa man 0.40% ha u 2024, iwa man archah na ka National Average wa 0.20% na kiwa chong chnong heiwa ka East Jaiñtia Hills kawa boon dooh, iwa kynjoh 2.388% wei 2,311 ngut wa em ya u HIV.
Ha u February, ka Union Health Ministry da chem ko ya soo District ka Meghalaya — East Jaiñtia Hills, East Khasi Hills, Ri Bhoi wa West Jaiñtia Hills wa kheiñ kam ki District wa joor bha ya kiwa da pyndap hapoh ka Mission AIDS Suraksha wow yakhun nei poor uni u HIV.
Katkam wa man ha ka jylla i yakhun da mang kyrpang wow pynsñiawthooh ya ki khynroo khyllood khamtam kiwa em ha skur wa College, kiwa pun-khon, kiwa em hakhap kiwa synjor (Vulnerable Population), kiwa em hei kreh i chait i khiah, kiwa mihkhmat paidbah, kiwa kreh sorkar, kiwa pathai khubor wa ki Social-Media Influencer.
Ka thong yong ka Intensified IEC Campaign 3.0 toh wow pynsñiawthooh chaphang ka HIV wa STI ha kylleiñ ki thaw nadooh i sñiawthooh bakla yeiwa kammon poor u khñiang, i yada nei chongkurim kulmar, i pynsñiawthooh khamtam ya ka National AIDS Helpline 1097 wa ka Online HIV Risk Assessment Tool.
Ka National AIDS Control Organisation da wanrah ko leh ya ki thong wow yada nei chah pait khmat, i e yada wei kamjooh i e sumaar.
Ka Meghalaya da sdang ko leh ya ka Integrated Health Campaign wa le bnai ha East Jaiñtia Hills deiwa leh ya ki HIV Test wa kiwi.
Discussion about this post