Ka sorkar Meghalaya lyngba ka chnat i chait i khiah da rai ko wow pynku ya ka nong ki ASHA naka Rs. 2000 cha ka Rs. 3000 deiwa wanrah da ka Scheme thymme kawa da e pyrtuid Community Based Health Incentive Scheme for ASHA.
Ya kani ka rai da chim ha ka yalang wa pynlai da ka Montri ka chnat, ka Dr. Ampareen Lyngdoh deiwa emlang ki sahep ka chnat ynne chirup wa kiwa mihkhmat ka Meghalaya ASHA Workers’ Union kawa da pynman ha Conference Hall, Main Secretariat, Shillong.
Ka Montri da pyntip ko wa i pynlut ka sorkar jylla chi snem man ko Rs. 17 klur chi snem deiwa su Rs. 2000 chi bnai kam ka nong (Honorarium) wa da e cha ki wei najrong kani da pynlut leh Rs. 22 klur hadooh Rs. 23 klur chi snem da ka NHM iwa man i nong wa da e cha ki ASHA katkam i kreh wa da ye ki u pyndep. Ka nong wa man-u-bnai wa da e cha ki ASHA toh kawa da sdang nadooh u April 2021 neidaw wa 70% ki chnong ha Meghalaya toh kiwa duna bru yow e kyrchaan cha ki ASHA heithaw wow e dei su iwa da kheiñ katkam i kreh wa leh ki.
Kani ka Scheme wa thymme u sdang noh ko u krehkaam kattu deiwa su noh Rs. 3000 heithaw ka Rs. 2000, wei hapoh kani, ki Village Health Councils (VHC) wa khlieh da u waheh chnong daw kitkhlieh ki wow pait hadooh katwon ye ki ASHA u pyndep yaka thong wa da booh ya ki.
Ka Montri da pyntip ko leh wa u Montri Rangbah da mynjur wow e pyntam Rs. 1000 ya ka Rs. 2000 kawa da su katni naka sorkar jylla.
Hapoh kani ka Scheme wa thymme, daw bichaar katwon u yoh pyntam ki ASHA deiwa pait yei yarap ki kamjooh ki VHC wa ki Health Teams cha ki PHC/CHC/Sub-Centers yow yarap wow yada ya ki manbei wa ki khynnah, i leh Screening ya ki kjut ki wym poor, u pyntikna wa 100% yoh tika ki khonboo wa dang kha hadooh kiwa dap chi snem wei wow pyntikna leh ki manbei wa punkhon waroh u yoh ki yaka ANC.
Da pyntip leh wa daw chna yaka Committee ka wow pait yei pynkrehkaam ya kani ka Community Based Health Incentive Scheme neibynta ki ASHA. Kani ka Committee daw kyntup lang ko ya kawi kawa mihkhmat ki ASHA na kawi pa kawi ka District, uwa mihkhmat na ki VHC na kawi pa kawi ka District, ki sahep ka NHM wa ki sahep ka jylla. Kani ka Committee u pait ko leh yei ood, i ujor ki ASHA.
Neiliang u Sampath Kumar, IAS, Principal Secretary, Health & Family Welfare Department ka sorkar Meghalaya da ong u wa ki ASHA ymtoh u khia wei wow pynkit kaam ware ya ki wei ka chnat leh da phah hukum ko cha ki Doctor, ki Mid Level Health Care Provider wa ki ANM wow lai hiar ki dei langær cha ki chnong wa pait ki ASHA yow pynjan ki yei e yarap cha kiwa chong chnong.
Discussion about this post