Ka KSU Lumshnong Unit da pynsñiaw ko yei sñiawkhia hajrong i khlaad noh u Sngewlang Suchiang (19 snem) uwa na ka chnong Lumshnong, East Jaiñtia Hills ha iwa da jia ha ka 18 tarik uni u bnai ha karkhana ka Star Cement hadien wa ka Truck 16 chaka wa yah da u Sailangmi Dkhar uwa na ka Mokynniang Khliehtyrchi, West Jaiñtia Hills yooh ko ya u Sngewlang.
Ka seiñ da ong ko wa u Sngewlang to uwa yah ya kawi ka kari Pick-Up wei da mut u wow chim Pass ya katai ka Truck boonsien nadooh na chnong Wahiajer Narpuh tangwa ym e laad uwa yah ya kani ka kari ka Star Cement wei hadien wa yoh laad u wow chim Pass da lai u wow psiah chapoh ka Star cement dei thmu wow yang ya katai ka kari ha ka Gate No.1.
Manda poi kani ka Truck hapoh ka karkhana ha ka thaw wa yang katai ka Pick-Up, da ku u Sngewlang ha katai ka Truck neiliang tidiang ka Truck dei thmu wow klam ileh wym e Pass u, tangwa uwa yah Truck mar ya ku u Sngewlang da pynhær smat u ya ka kari wei da haap noh u Sngewlang uwa da chah yooh hadooh wa yap, da ong ka seiñ, deiwa pynrap wa ini man ko leh katkam wa da yoh riñ da ka CCTV wei katkam wa ong kiwa sakhi.
Ka seiñ da beiñ joor ko yeini wa leh uni uwa yah Truck deiwa kyntu ya ki bor yong ka aiñ wa toh u beh u kdong oo wei wow pynchitom katkam ka aiñ, chooh chooh da ong wa katkam wa yoh khubor wa mar ya tip ki paidbah ka chnong yeini wa jia da lai ki cha kani ka karkhana yow pyntikna yeiwa jia sakhiat wei wow thooh ya uni uwa yah Truck tangwa ki Security yong katai ka Company siat kuli ki tangwa da embhah ym em wa mynsoo.
Manda jia ini, da pynchrai ko ya ki paidbah hadooh wa mih i awri awra deiwa maham ya kiwa yah Truck ka Star Cement neibhah nei leh heh ki wei pynhær kari khlem da kheiñ de ya kiwi dapoi cha ini wa jia wei ya kam kini da toh u pyndooh kreh noh ki.
Ka seiñ da pynkynmoo ko wa dang ha kini ki kajiak bnai hawa kiwa yah kari ka Star Cement da dawa ki yei hok na katai ka Company yow pynku ya ka bai kari yong ki, neiliang ki khon ka chnong Lumshnong leh da e mynsien wei da kyrchaan ki ya ki paradoh parasnaam deiwa lai synranlang ha ryngkat ki dkhot ka VPP yow dawa yei hok. Tangwa kat u yoo da su kylliang da kamni ya ki mynsien wa lui lui kiwa chong chnong.
Ka KSU Lumshnong da dawa ko leh na ka Star Cement wow kitkhlieh ko neibhah kani toh ka kari yong ka wei ka manyung uwa khlaad toh kiwa dooh wa duk wei man u leh du oo samen wa yarap ya u pa yow psa ya ka yung.
Ka seiñ da phah ko leh ya ka kyrwoh sñiawlem cha kiwa ha-yung ha-sem wa waroh kiwa emyatoh kiwa da piah dohnood na ini wa khlaad syndet u Sngewlang.
Discussion about this post