Kam chibynta ka International Day Against Drug Abuse & Illicit Trafficking hajrong ka phang “Breaking the Chains: Prevention Treatment and Recovery for All”, neiliang ka seiñ Federation of Khasi Jaiñtia & Garo People (FKJGP), West Jaiñtia Hills District chirup i yakrehlang waka chnat Directorate of Social Welfare ka sorkar jylla, ha ka 25 tarik sngi da pynman ko da ka Rally pyrchah drugs ha Jowai wa da chimbynta da ki khynnah skur kiwa sikai wa kiwi.
Ya ka Rally da sdang na laad Kiang Nangbah College deiwa lai ter ter u sarok lyngba ka Iawmusiang wei da pynkut ha District Library, Mynthong ha deilang i rah ya ki Placard wa em ki kyntien pyrchah drugs, i e wyrta lyngba i sur i rwai wow yakhun pyndooh pyndam ya uni u jait dih, kamjooh leh i kbai wow ya ong bait wym bien yei drugs.
Hadien wa poi ki ha Auditorium ka District Library da em sa ka yalang batai bniah hajrong i drugs wa da wan wow e i klam batai bniah na ki bru chemphang wa kynthup u N. Pariat, Retired Asst. Professor Grade-1, ka Sunita Suna, SSK-DSRC Manager wa u Dr. H.H. Mohrmen, Secretary ka SURE.
Chwa ini kiwa e i klam kynthup ki ya u President ka Synjuk Waheh Chnong Ri Jaiñtia, u Army Lypon, u General Secretary ka JSU, u Nielkee Mukhim, u President KSU-EJHD, u Leningrad Tariang, u President Rangbah ka FKJGP Central Body, u Dundee Cliff Khongsit wa kiwi kiwa da kyntu joor ya ki khynnah skur wow kiar hi wot na kini ki jait dih neibhah chisien wa da ngop da eh u kiar.
Da ong ki leh wa kini ki jait dih man haroh ki kam kiwa choon ya ka yung ka sem, ka chnong ka thaw wa ka ri ka jaitbru najrong wa pynpoor haroh yei sih wa boonjait.
Wei neidaw wa i drugs da sooh thied i wot cha ki chnong wa em cha kdong leh, neiliang u President ka Synjuk Waheh Chnong Ri Jaiñtia kyntu u wow lai pynman haroh kam kani ka pynsñiawthooh cha ki thaw ki yaaw wa cha palatsor khang wa ki paidbah u che u sñiawthooh ki.
Discussion about this post