U montri ka chnat bordiñ ka jylla, u James K. Sangma ynne da ong u wa ka sorkar da rai ko wow pyndooh bordiñ (Load Shedding) 3 kynta ya ki paidbah wei 10-12 kynta ya ki karkhana deiwa ong wa da thooh ki laad wow pynduna yei thied bordiñ na ki yaw khnang wow pyndap yei emkaam ki paidbah neibhah katni emkaam wow pyrkhat ya ki khynnah kiwa yaleh Exam.
Heiyatoh wa mynnu u pyndam noh yei pyndooh bordiñ, u James da ong u wa ini waroh chong i ha ka Rural Electrification Corporation wa ka Power Finance Corporation heiwa kat mynnu u pynlait ya ka ram Atmanirbhar Bharat.
Da ban joor u wa da pyrkhat bha ya ki khynnah kiwa pynkhreh ya ki Exam wa ha rukom yong ki.
Hajrong i pynbaad wa da thung ya ki sahep wa dang khian ha ki kyrdan CMD ka MeECL u Sangma da ong u wa ini toh iwa da pynmyllien da slem wei ym em kyndon wa ong wa emkaam wow thung da ki sahep wa da heh namo da ki IAS wa da heh rta ha ini i kyrdan wei emkaam wow pait ya u bru uwa ye sakhiat wow kreh ya ini i kaam.
Da yaroh u leh ya i kreh wa da leh u CMD wa u Joint Secretary kiwa da leh hok yei kaam yong ki deiwa pynksan leh yeiwa thung ka sorkar ya ki.
Heiyatoh wa i tyrwa u CMD ka MeECL wow takit laitlooid hajrong i tooh bordiñ ki karkhana ka Byrnihat, u Sangma da ong u wa dang ini wadep sdang mih pyrthai kini waroh wei ka sorkar da chimkhia ko yeini waroh lada u pynman da ki takit kiwa ha rukom.
U James da ong u leh wa em chiboon ki kaam tooh iwa wanrah yei dooh nong ya ka MeECL ym du na i tooh bordiñ tangwa wot na i rukom thung kreh leh.
Da antaad leh wa ka MeECL ha ka chi snem du na ki kaam tooh bordiñ da dooh ko palat T. 100 klur kawa toh u ye u pynemkaam poisa yow su tulop waka bai bordiñ heipor.
Da ong u leh wa ka MeECL da chem ko chiboon i eh i khoo iwa da ngam yillu bha iwa da pynthut yei rukom krehkaam ka MeECL deiwa pynrap leh wa ym maap ya kiwon kiwon kiwa emkti ha ki kaam wa ktah ya ka.
