Heiyatoh wa i yap u khynnah wa dang 17 snem uwa tip kam u Nathaniel Sohtun uwa lai puræ Class-XI ha Jawahar Navodaya Vidyalaya (JNV), Mawphlang deiwa chah riñ bordiñ heipor wa sum khlieh ha ka 28-07-24, neiliang ka bei u khynnah da yaleh ko da ka mukotduma ha ka Meghalaya High Court pyrchah ya kani ka skur.
Katkam ka mukotduma da ong wa heipor wa jia ini, u Nathaniel da lai sumkhlieh u ha Terrace ka Hostel B-2 kani ka skur neidaw wym em um ha ki kamra thaw sum wei heini i por u Nathaniel da tba u ya u Pipe um khlem da tip toh uwa da yabi wa u sainar bordiñ hadooh wa khlaad u.
Neiliang ka bei u Nathaniel da dawa ko wow pynchitom ya kani ka skur ka wym em chimkhia wow yada ya ki khynnah nei maa wei heipor wa jia ya u Nathaniel da slem leh wow lai thooh yarap ya oo hadooh wa kat u poi u ha ka CHC da khlaad chwa u wei kani ka Terrace toh u man ko kawa khang ymtoh kawa u yoh ki khynnah u lai cha ka.
Chooh chooh da ong wa lada kani ka Hostel pynbiang um ko ha ka thaw sum ym jia kamni wa hap lai sum u khon ko cha Terrace.
Da chem leh wa ha ka Magisterial Inquiry wa da leh, wa neiliang ki khynnah dadep ki wow pyntip cha ka skur wa pai ka um wei ym em leh biang ki sainar bordiñ tangwa ym em leh iyi iyi. Hadien wa lai pait lai sylli da u Senior Electrical Inspector ya ka Main Control Room neibynta ka bordiñ da chem wa kani ka thaw da pynman kam ka thaw noh jhep iwa da chem chitom wow chem kiwon ki Switch kiwa da sih wei yei poi i bordiñ cha ka Pump leh kamjooh.
Ka High Court hadien wa da ap da puræ ya waroh ki Report wa da yoh, da chim rai ko wow phah su Rs. 6.5 lak da ka skur JNV Mawphlang najrong ka Rs. 1 lak kawa dadep su chwa ka skur cha ka yung uni u khynnah wei yeini hap wow leh hapoh phra tayaaw nadooh ka 28 tarik wa da pynmih ya kani ka hukum.
Discussion about this post