Deiwa pyrkhat lang yei em ka Lockdown wa da pynkrehkaam ha thaaiñ Guwahati, Assam. Neiliang ka sorkar Meghalaya leh da chim ko yaka rai wow phah khang lut ya waroh ki dukan wa em cha rood sakrok kamjooh kiwa em khappood waka jylla Assam nadooh na Byrnhihat hadooh Rani ha Ri-Bhoi District.
Ya ini da pyntip da u symbood montri rangbah ka jylla u Prestone Tynsong ynne ka sngi wa ya ini i phah khang dukan u sdang ko nadooh myntep ka 30 tarik hadooh ka 15-07-20 wei yei u pteiñ iwa chong hei long i man ha kini ki sngi wow wan.
Ya ini da phah wow leh ka DC ka District wei da leh ya ini kam wow yada yei poor u khñiang khlam COVID-19 yow lait u wan kiwa na Assam chapoh ka jylla kiwa thooh dukan, da pyntip u Prestone.
Chooh chooh da pyntip u leh wa i khang wow lai na kawi ka jylla cha kawi u pteiñ ko kamjooh hi hadooh ka 15-07-20 wei daw piat won hadien. Da pyntip u leh ini u krehkaam i hajrong ki kyndon kiwa da krehkaam chwa hapoh ka jylla.
Ha iwi won i liang da pyntip u wa ya kiwa liwan na baar jylla, neiliang ka sorkar jylla u pynbiang hi ko yaki kari wow li booh ki cha ki jar jiar ki District yong ki.
