I thmu wow wanrah ya ka Shillong Campus yong ka Captain Williamson Sangma State University da tyngkhooh moochynthut ko hadien wa i thaw wa da thmu wow booh ha Bijni Complex da em ko hapyrdi ka yakhun mukotduma ha yung bichaar High Court neidaw wa yaknieh mantre.
U Montri wa pait ya ka chnat puræ puthi, u Rakkam A Sangma hawa klam wa ki laad pathai khubor da pyntikna u yeini wa ka Bijni Complex kawa ka sorkar da tipmit ko kam i thaw wow booh ya ka Shillong Campus toh kawa da em hei yaknieh thaw wei dang chah bichaar.
Ya ka mukotduma toh kawa da leh da ka North Eastern Hills University (NEHU) kawa da ong wa man ko ka tre ya kani ka thaw nadooh wa chna ya ka.
Neidaw wa em kani ka mukotduma, neiliang ka sorkar da sdang pait ko cha kiwi ki thaw yow booh ya kani ka Campus ha Shillong wei da yaklam wa ka Urban Affairs yow e thaw ha thaaiñ Mawdiangdiang yow yoh da ka thaw wa pura. Wei neibynta iwa chipor dang yaklam leh yow chimwai da i yung yow yoh u sdang noh ya ka Shillong Campus rap smat.
U Rakkam da pyntip u leh wa ka chnat pyrchang ko la kammon kammon wow wanrah chwa da ka Administrative Office yong ka Shillong Campus, katwa dang thooh thaw wa paka.
Da pyntip u leh wa ka sorkar daw thung ko ya u Pro-Vice Chancellor neibynta kani ka Shillong Campus, kamjooh ya kiwi ki Officer wa rap emkaam yow sdang noh rap smat.
Discussion about this post