Hadien wa poor i Video wa pynyoo da ki bru wa kam wa suk bha u psiah pyrchah aiñ lyngba ka Bangladesh cha India ha ki bynta wym pu em kær pood, neiliang ka Border Security Force Meghalaya da pynche ko wa deiwa ong wa emkaam u pynneh yei man kyntang u pood.
Nyngkong da ong wa ini i Video wa booh da uwi u Bangladeshi YouTuber ynnin u snem ha u March 2023 wei da em wa pynpoor biang ki katni. Heiwa ha ini i Video da pynyoo ya kiwa boon ki thaw wa em ha khappood ka Bangladesh wa ye u psiah cha India heiwa kiwa pait ya ini i Video da ngait ki ini wa pynyoo toh iwa sakhiat tangwa ymtip won ki yei sakhiat kammon ka jait yada wa em katni ha khappood.
Kamtæ da ong wa kini kiwa pynpoor biang ya ini i Video katni toh kiwa kwah u yoh Follower donhi yow kheiñ sepai yei kreh chitom ki BSF yow khanglaad ya kiwa boom ki kaam pyrchah aiñ ha khappood.
Neiliang u IG BSF Meghalaya da kyntu u ya ki paidbah kamjooh ki laad pathai khubor wow sñiawbha ki wow pyntikna chwa chwa wow pynmih pynpoor neibhah daw ktah ko yei naam i burom ki chipai.
Chooh chooh da pynche wa ini i Video toh iwa da dep pyndam (Delete) da uwa chna ki iwa pynyoo wa ymtoh iwa sakhiat.
Da pynkut deiwa ong wa ka BSF toh kawa kreh chitom wow yada ya u pood ka ri deiwa kreh deiwa miat tam wei deiwa bha tam.
Discussion about this post