U montri rangbah warim ka jylla, uwa man leh uwa yahkhmat ya ka liang pyrchah ha yung dorbar chna aiñ ka jylla, u Dr. Mukul Sangma ynne da ong u wa i yaklam pynbait pood hapyrdi ka Assam wa Meghalaya toh u man i hajrong ki kot ki sla wa da pynkhreh da ki sorkar ha ki 12 tylli ki thaw.
Da ong u wa katkam ka yalang hpyrdi u montri rangbah ki jylla wa katni, u Conrad Sangma wa u Himanta Biswa Sarma, neiliang u Himanta da ong u wa ka Assam em ko jar jiar i rukom sñiawthooh hajrong i kam ka Meghalaya.
Da ong u wa katkam wa man hi, i sakhiat chong i ha ki kot wa pynkhreh ka Meghalaya deiwa pynrap wa iwon iwon i kaam wow yasuk pynbait pood toh u pdiang da ki paidbah ka jylla.
U Dr. Mukul da kdaw u leh yeiwa ymbien u pynkrehkaam ya ka Inter State Border Area Development Programme deiwa ban wa kani ka sorkar jylla wa katni da duna poisa ko wow sñiawthooh yeiwa emkaam ki bru kiwa im ha khappood.
Chooh chooh da ong u wa ka sorkar Meghalaya da pyndooh ko ya ki paidbah khappood wa ki Scheme wa toh u yoh ki katkam ki Inter State Border Area Development Programme wa sdang da ka sorkar Congress wei ya kani ka poisa da pynemkaam chawi tawon.
Heijooh i por da ong u wa i yaklam ar sien ki montri rangbah ha ka 6 tarik uni u bnai ha Guwahati hadien ka 23 Naiynñiaw ha Shillong da rai wow kreh palat bar ya iwa da rai chwa namo ka “Status Quo”.
Da pyntip u leh wa daw lai u cha Iongkhuli mynstep ka sngi wow tip yeiwa jia ha kani ka chnong.
