Ka Education Committee ka chnong Panaliar kawi na ki Committee wa pait wa pynlai ya ki kaam wa yatoh wa ka skur yong ka chnong, da pynkup burom ko ko ha ka 26 tarik ya ki khynnah wa yaleh SSLC kiwa da Pass na ka skur Panaliar Secondary School, Jowai, ki wa da Pass nadooh u snem 2021 hadooh uni u snem 2025. Ha kani ka yalang da emlang u MLA ka Jowai u Wailadmiki Shylla kam u kongsan deilang wa u Lasky Rymbai, Dy. CEM ka JHADC kam u symbood kongsan.
Da yoh yei klam sdang na u Sienmitre Sumer, Chairman ka Committee katwa yei lai luti ka skur nadooh wa sdang u man Secondary da yoh na ka Headmistress, kaDabunki Sumer.
Ya kiwa boon ki bynta kiwa ka Education Committee da pyrkhat sani bha ko, kammon wou pynku ya ka skur Panaliar Secondary School Jowai, da batai bniah da ka Dr. Wa-i-a Sumer kawa man ka dkhot ka Committee kawa da e buit e bor wei e mynsien ya ki khynnah skur yoh ki u nang kaap chaphrang ha ki kaam puræ ki yong ki. Da e nuksa ko leh pun ya ka dahi, kawa man kawi na ki khynnah skur katai ka skur. Ong ko ka hi hadooh wa da kreh ko leh, dang ye ko u pyndep yei kyrdan Ph.D, phi ki khynnah skur leh toh u em phi ka thong kamtæ.
U Waheh Chnong ka chnong Panaliar, u Riquoma Rq. Laloo, hei klam yong oo, da pynsñiaw u yei kmen, iwa ka Education Committee da ye ko u pyndep yeiwa sah. Da e mynsien haroh u ya waroh, nadooh ki khynnah skur, ki bei ki pa wa kiwa sikai, dei wa ong wa i kræh chitom kiwa sikai kamjooh ki bei ki pa wanrah ko ya u soh wa bha ha ki khynnah skur wa puræ. Boonsien manda Fail ki khynnah, jooh ong i wym hoi kiwa sikai, tangwa manda psa ki, ym em wa ong wa hoi kiwa sikai næ. Katwa kamtæ, emkaam bha ka yakrehlang waroh le, yoh u ye u wanrah burom ha waroh ki liang, ong u waheh chnong.
Neiliang u Lasky Rymbai da e u ki kyntien pynchlur wei e bor e mynsien u ya ki khûnnah deiwa ong wa i stat i tip toh iwa ye u pynkylla dur ya ka mynried. Da ong haroh u wa emkaam u yoh i ymtoh du yei kyrdan puræ donhi, wa hakhmat dooh toh i akor i salon hei manbru longbru, iwa ka yung ka sem waroh kawi thrang ko. E yaroh u ya ka Education Committee, hei yahkhmat u paralok wa yajan yong oo, u Kyllimot, yoh ki kaam ka skur u nangku nangku chooh chaphrang.
Hei klam u kongsan da yaroh u yei krehkaam ka chnong Panaliar, kawa man kawi na ki chnong kawa da ku bha ha kiwa boon ki liang. Ha ka hi em ko chiboon ki Committee wow pait wow sylli ya ki kaam chnong, ka wow e laad ya ki khon ka chnong wou tia chakhmat wow ya krehkaam. E yaroh u kyrpang u ya u waheh chnong wa katni, u Riquoma, wa stat u pynlai ya ki kaam nadooh wa ksoh sakhiat u yeikaam da sñiaw u wa kylleiñ mih i pyrtuid i naam wa bha yong oo wa ka chnong. Ong u kam uwa mihkhmat u emlang u chirup heiwon iwon i bynta wa ka chnong sñiaw emkaam ko ya oo, ymhoi u sñaw salajong wow khynjoh ktien ya ki kaam pynroi pynbha hapoh ka chnong ka thaw. Heiyatoh wei puræ puthi hao da ku bha katni kiwa stat wa tip, tangwa sñiwsih won u yoo wa ha jylla yong i duna bha kiwa Pass IAS, IPS wa kiwi kiwi ki kyrdan waheh ha ki chnat waphær waphær. Kyntu chooh chooh u ya ki khynnah skur wow man kiwa minot, wei ymtoh u mang du kat yeiwi bait i kaam sorkar yoh u yaknieh wei wow ong wym yoh khih yohkhan. Ki khih chiboon em ki, ka sorkar wai ko ki laad ki luti wou seiñkhih seiñkhan, jar jiar ka sap wa em ha phi. Ymtoh u man kiwa chah pynbor yei puræ puthi, ka mon yong phi dahi, kawa em nadooh mynsien, katæ donhi wow ye u yah ya phi cha ka thong wow jop.
Ong u, puræ hawa dep kamwa da e but ka Dr. Wa-i-sa, da pyndep ko ya ka Ph.D, kawa mut puræ hawa dep. Heiwon iwon iwa da thmu phi toh u pyndep, yoh u rah yei naam i burom.
Da yoh yei kyntien e khublei na u Secretary, u Kyllimot Lhuid katwa yei kyntien ngoohblai hawa sdang da e da u Barlee Moore Shilla, Vice Chairman, Education Committee.
Da em leh i pynwyrngia na ki khynnah skur dei chaad tynre wei ya ka yalang da pynlai da ka Hamya Shylla wa u Ikwol Sumer. Hachwa wow pynkup burom da yoh yei klaam na ka khynnah skur, ka Merina Phawa ka wa yoh nyngkong na waroh.
Discussion about this post