Jowai : Ki thaw khrong dan (Customary tax) ki Dolloi ka ri-loom Jaiñtia ynne ka sngi da khang lut ya ki waroh pyn da ki Dolloi hi kam i dak wa ki kwah ki u krehlang wa ka JHADC.
Ynne ka sngi u Dolloi ka Elaka Nongtalang u Chui Pohlynjar leh da phah chithi u cha ka JHADC wa hadien wa yoh u ya ka Closure Notice wa ka Show Cause Notice ha ka 23.08.16 kamjooh leh wa hadein wan hajir u ha khmat ka Executive Committee u ma Thombor Shiwat da rai u wow khang noh ya ka thaw khrong dan hapoh ka Elaka yong oo wei yeini da leh u hadien wa dep chong pyrkhat wa ki dkhot ka Elaka wei da sñiawthooh wa ini i khrong khajna toh iwa man pyrchah-aiñ.
Neiliang ka JHADC da booh ki ynne ka 24 tarik kam ka sngi khaddooh ya ki Dolloi yow wan pyndem ki ha khmat yong ki wow lait noh ki u embynta ha ini i khrong dan wei lada ym leh ki yeini daw suspend ya ki katkam ka aiñ yong ka Council.
Katkam i ong u ma Thombor na ki 7 ngut wa mut ki u suspend u Dolloi ka Narpuh, Sutnga, Nangbah, Raliang, Nongjngi wa ka Lakadong toh kiwa ym pu em e dei thoh wa da ran dien ki na i khrong ya ki Customary Tax hanlada da em na kini kam u Dolloi ka Narpuh, Sutnga, Raliang, Lakadong da dep e ki ya ka chithi wa soi pyrtuid lang ki wa da khang ki ya ki khyrdop khrong khajna ha ki Elaka yong ki wei smat ki u yachong wow phyllu yumut hei yatoh wa ini.
Neiliang ki Acting Dolloi, u Acting Dolloi ka Elaka Jowai u ma Puramon Kynjing da ran dien u nei kyrchaan ya i khrong dan.
Da pyntip leh mynstep u phah kot cha ki Dolloi wa dang pyrchah ya ka Council wei daw pyntip kammon u rai u pynchitom ya ki.
Discussion about this post